ຕໍ່ກັບກໍລະນີທີ່ສະມາຄົມອຸດສາຫະກຳອາລູມີນຽມອາເມລິກາຮ້ອງຂໍໃຫ້ສອບສວນຕ້ານການເທຕະຫຼາດແລະການອຸດໜູນແຜ່ນອາລູມີນຽມ (Aluminum foil) ທີ່ຈີນສົ່ງອອກໃຫ້ອາເມລິການັ້ນ, ທ່ານຫວາງເຮີ້ຈິ່ນ ຫົວໜ້າກົມສືບສວນ-ສອບສວນການອຸດໜູນການຄ້າ ກະຊວງການຄ້າຈີນ ກ່າວໃນວັນທີ 10 ມີນານີ້ວ່າ: ຈີນຫວັງວ່າອາເມລິກາບໍ່ຄວນໃຊ້ມາດຕະການປົກປ້ອງການຄ້າຕາມລຳພັງ.
ທ່ານຫວາງເຮີ້ຈິ່ນ ເນັ້ນວ່າ: ການຮ່ວມມືແມ່ນທາງເລືອກທີ່ຖືກຕ້ອງພຽງໜຶ່ງດຽວທີ່ເຮັດໃຫ້ຈີນແລະອາເມລິກາຕ່າງຝ່າຍຕ່າງມີຜົນປະໂຫຍດ, ຂະນະທີ່ການຮ່ວມມືດ້ານອຸດສາຫະກຳອາລູມີນຽມລະຫວ່າງສອງປະເທດມີອະນາຄົດທີ່ສົດໃສ ແລະຄວາມຈິງແລ້ວ ວົງການອຸດສາຫະກຳອາລູມີນຽມຂອງສອງປະເທດກໍໄດ້ຮັກສາກົນໄກການແລກປ່ຽນເປັນຢ່າງດີ. ທ່ານກ່າວຕື່ມວ່າ: ຈີນຫວັງຢາກໃຫ້ວົງການອຸດສາຫະກຳອາລູມີນຽມຂອງສອງປະເທດສືບຕໍ່ຜ່ານການປຶກສາຫາລື ແລະ ສົນທະນາກັນ ແກ້ໄຂບັນຫາລະຫວ່າງສອງຝ່າຍໃຫ້ດີ. ຂະນະດຽວກັນ ກໍຫວັງວ່າກະຊວງການຄ້າອາເມລິກາຈະປະຕິບັດການຢ່າງລະມັດລະວັງ ແລະປະຕິເສດການສອບສວນແລະດຳເນີນຄະດີກ່າວຟ້ອງທີ່ສ້າງຜົນເສຍຫາຍແກ່ການຮ່ວມມືແບບຕ່າງຝ່າຍຕ່າງມີຜົນປະໂຫຍດ.