ວັນທີ 11 ມີນານີ້, ໂອກາດກ່າວເຖິງການຢ້ຽມຢາມຟິລິບປິນໃນຫຼາຍມື້ກ່ອນ ທ່ານຈົ່ງຊ່ານ ລັດຖະມົນຕີວ່າການກະຊວງການຄ້າຈີນເວົ້າວ່າ, ຈີນແລະຟິລິບປິນໄດ້ປຶກສາຫາລືແລະຕົກລົງວ່າ ຈະຮ່ວມກັນສ້າງເຂດສວນອຸດສາຫະກຳຢູ່ຟິລິບປິນ.
ໃນງານຖະແຫຼງຂ່າວຂອງກອງປະຊຸມສະພາປະຊາຊົນແຫ່ງຊາດຈີນຄັ້ງທີ 5 ສະໄໝທີ 12 ທີ່ຈັດຂຶ້ນໃນວັນທີ 11 ມີນານີ້, ທ່ານຈົ່ງຊ່ານກ່າວວ່າ, ທ່ານຢ້ຽມຢາມຟີລິບປິນໃນຫວ່າງມໍ່ໆນີ້ ແມ່ນການຢ້ຽມຢາມຄັ້ງທຳອິດຫຼັງຕົນຂຶ້ນຮັບຕຳແໜ່ງລັດຖະມົນຕີກະຊວງການຄ້າຈີນ, ເຖິງວ່າການຢ້ຽມຢາມເປັນເວລາສັ້ນກໍຕາມ, ແຕ່ໄດ້ດຳເນີນໄປຢ່າງກົງໄປກົງມາແລະຕິດແທດຕົວຈິງ ທັງໄດ້ຮັບໝາກຜົນອັນອຸດົມສົມບູນ. ໃນໄລຍະຢ້ຽມຢາມນີ້ ຈີນແລະຟິລິບປິນໄດ້ມີຄວາມຮັບຮູ້ເປັນເອກະສັນກັນຫຼາຍຢ່າງໃນດ້ານການຄ້າ ການລົງທຶນ ການສ້າງເຂດສວນ ການສ້າງສິ່ງກໍ່ສ້າງພື້ນຖານໂຄງລ່າງທີ່ສຳຄັນ ແລະການຈັດສັນການຄ້າໃນຂົງເຂດຫຼາຍຝ່າຍ.
ທ່ານກ່າວວ່າ, ການຄ້າລະຫວ່າງຈີນກັບຟີລິບປິນໄດ້ເຕີບໂຕອ່າວຊ້າຍ້ອນສາເຫດຕ່າງໆໃນຫຼາຍປີຜ່ານມາ, ແຕ່ໃນຫຼາຍເດືອນມໍ່ໆຜ່ານມານີ້ ພັດໄດ້ເພີ່ມຂຶ້ນຢ່າງວ່ອງໄວແລະມີທ່າແຮງເຂັ້ມແຂງ, ເຊິ່ງສະແດງໃຫ້ເຫັນວ່າການຄ້າລະຫວ່າງສອງປະເທດມີຄວາມຈູນເຈືອກັນຢ່າງຫຼວງຫຼາຍ. ທ່ານເຊື່ອວ່າ ພາຍໃຕ້ຄວາມເອົາໃຈໃສ່ໃນລະດັບສູງຈາກປະມຸກລັດສອງຊາດ, ການພົວພັນລະຫວ່າງຈີນກັບຟິລິບປິນຍ່ອມຈະຂະຫຍາຍຕົວຢ່າງດີກວ່າເກົ່າແລະໄວກວ່າເກົ່າ, ການຮ່ວມມືເສດຖະກິດການຄ້າລະຫວ່າງສອງປະເທດກໍຈະໄດ້ຮັບຜົນງານທີ່ອຸດົມສົມບູນຕື່ມອີກ, ປະກອບສ່ວນຫຼາຍກວ່ເເກົ່າເຂົ້າໃນການພັດທະນາເສດຖະກິດສັງຄົມຂອງສອງປະເທດ.
 |
