ຕາມຂ່າວສານຊິນຮວາ:ສຳນັກຂ່າວສານຕັສລາຍງານໃນວັນທີ 12 ມີນານີ້ວ່າ,ທ່ານເປັສໂຄບ ເລຂາຖະແຫຼງຂ່າວປະທານາທິບໍດີຣັດເຊຍກ່າວຫວ່າງມໍ່ໆນີ້ວ່າ,ຖ້າຣັດເຊຍແລະອາເມລິກາບໍ່ສາມາດຕົກລົງກ່ຽວກັບການພົບປະເຈລະຈາລະຫວ່າງຜູ້ນຳໃນໄລຍະໃກ້ໆນີ້,ການພົບປະກັນເປັນຄັ້ງທຳອິດລະຫວ່າງທ່ານວະລາດີເມຍ ປູຕິນ ປະທານາທິບໍດີປະເທດຕົນແລະທ່ານໂດນັນ ທຣຳ ປະທານາທິບໍດີອາເມລິກາກໍຄາດວ່າຈະຈັດຂຶ້ນໃນໄລຍະກອງປະຊຸມກຸ່ມ 20 ປະເທດຫຼື G20 ໃນເດືອນກໍລະກົດປີນີ້.
ທ່ານເປັສໂຄບກ່າວວ່າ,ອາເມລິກາກ່າວຫາຣັດເຊຍກ່ຽວພັນກັບການເລືອກຕັ້ງທົ່ວໄປຂອງປະເທດດັ່ງກ່າວແລະໃສ່ຮ້າຍປ້າຍສີຣັດເຊຍເຊິ່ງເລື່ອງນີ້ພວມຂັດຂວາງການປັບປຸງສາຍພົວພັນລະຫວ່າງສອງປະເທດ.ແນວໃດກໍດີ,ສິ່ງສຳຄັນທີ່ສຸດສຳລັບສອງຝ່າຍໃນຕໍ່ໜ້ານີ້ກໍຄືຜູ້ນຳສອງປະເທດຄວນນັ່ງເຊິ່ງໜ້າແລະເລີ່ມເຈລະຈາກັນ.
ກ່ອນໜ້ານີ້,ທ່ານເຊີເກ ຣີອັບໂຄບ ຮອງລັດຖະມົນຕີກະຊວງການຕ່າງປະເທດຣັດເຊຍກ່າວຕໍ່ສື່ປະເທດຕົນວ່າ,ເຖິງວ່າເວລາແລະສະຖານທີ່ຈະພົບປະກັນລະຫວ່າງຜູ້ນຳສອງປະເທດຍັງບໍ່ທັນຕົກລົງກັນເທື່ອ,ແຕ່ກໍພວມດຳເນີນການກະກຽມໃຫ້ແກ່ການເຈລະຈາດັ່ງກ່າວ.
 |
