ວັນທີ 13 ມີນານີ້, ທ່ານ ຫຼີເຄີ້ສຽງ ນາຍົກລັດຖະມົນຕີຈີນໄດ້ສົ່ງສານຊົມເຊີຍມາຍັງທ່ານນາງ ເດີຣີຊາ ເມ ນາຍົກລັດຖະມົນຕີອັງກິດໃນໂອກາດວັນຄົບຮອບ 45 ປີຂອງການສ້າງສາຍພົວພັນທາງການທູດລະດັບເອກອັກຄະລັດຖະທູດລະຫວ່າງຈີນ-ອັງກິດ.
ທ່ານ ຫຼີເຄີ້ສຽງ ກ່າວໃນສານວ່າ: ຕະຫຼອດໄລຍະ 45 ປີຜ່ານມາ, ຜົນປະໂຫຍດລະຫວ່າງຈີນ-ອັງກິດໄດ້ເຊື່ອມໂຍງເຂົ້າສູ່ລວງເລິກຢ່າງບໍ່ຢຸດຢັ້ງ, ການຮ່ວມມືແບບຕ່າງຝ່າຍຕ່າງມີຜົນປະໂຫຍດໄດ້ຮັບໝາກຜົນຢ່າງຫຼວງຫຼາຍ, ການພົວພັນກັນດ້ານວັດທະນະທຳນັບມື້ນັບແໜ້ນແຟ້ນຂຶ້ນ, ປະຊາຊົນສອງປະເທດລ້ວນແຕ່ໄດ້ຮັບຜົນປະໂຫຍດຢ່າງແທ້ຈິງ. ຂະນະດຽວກັນ,ຈີນກໍຍິນດີຮ່ວມກັບອັງກິດສຸມທຸກຄວາມພະຍາຍາມເສີມສ້າງຄວາມໄວ້ເນື້ອເຊື່ອໃຈກັນທາງການເມືອງໃຫ້ໜັກແໜ້ນກວ່າເກົ່າ, ການຮ່ວມມືທີ່ແທ້ຈິງແລະຕ່າງຝ່າຍຕ່າງມີຜົນປະໂຫຍດຈະໄດ້ຮັບໝາກຜົນໃໝ່ ເພື່ອສ້າງຄວາມສົມບູນພູນສຸກໃຫ້ແກ່ປະຊາຊົນສອງປະເທດ.
ສ່ວນທ່ານນາງ ເດີຣີຊາ ເມ ກໍໄດ້ສົ່ງສານອວຍພອນຕໍ່ລັດຖະບານແລະປະຊາຊົນຈີນ. ທັງໄດ້ຢືນຢັນວ່າ: ການພົວພັນຄູ່ຮ່ວມມືລະຫວ່າງອັງກິດ-ຈີນໄດ້ພັດທະນາຢ່າງຕໍ່ເນື່ອງ, ການໄປມາຫາສູ່ກັນລະຫວ່າງການນຳຂັ້ນສູງຂອງສອງປະເທດນັບມື້ຫຼາຍຂຶ້ນກວ່າເກົ່າ, ການພົວພັນດ້ານການຄ້າແລະການລົງທຶນນັບມື້ໄດ້ຮັບການສົ່ງເສີມຂຶ້ນຕື່ມອີກ,ລວມທັງດ້ານວັດທະນະທຳກໍໄດ້ພັດທະນາເຂົ້າສູ່ລວງເລິກຢ່າງບໍ່ຢຸດຢັ້ງ. ແນວໃດກໍດີໃນອະນາຄົດ, ການຮ່ວມມືລະຫວ່າງສອງປະເທດຈະໄດ້ຮັບໝາກຜົນທີ່ອຸດົມສົມບູນຫຼາຍກວ່າເກົ່າ.