ຕອນຄ່ຳວັນທີ 13 ມີນານີ້, ສະພາສູງອັງກິດໄດ້ລົງຄະແນນສຽງຮັບຮອງຍັດຕິຖອນອອກຈາກສະຫະພາບເອີຣົບ ແລ້ວທັງໄດ້ກຳຈັດອຸປະສັກທາງກົດໝາຍຕໍ່ການດຳເນີນຂັ້ນຕອນການຖອນອອກຈາກສະຫະພາບເອີຣົບຂອງປະເທດຕົນ. ທັງນີ້ລັດຖະບານອັງກິດຈະນຳໃຊ້ມາດຕາທີ 50 ຂອງສັນຍາລິສບອນໃນທ້າຍເດືອນນີ້ ແລະ ເລີ່ມດຳເນີນການເຈລະຈາຖອນອອກຈາກສະຫະພາບເອີຣົບ.
ໃນທ້າຍເດືອນກຸມພາຜ່ານມາ, ສະພາຕ່ຳອັງກິດໄດ້ຜ່ານຍັດຕິການຖອນອອກຈາກສະຫະພາບເອີຣົບດ້ວຍສຽງສ່ວນຫຼາຍ ແລະໄດ້ຍື່ນຍັດຕິໃຫ້ສະພາສູງຄົ້ນຄວ້າພິຈາລະນາ, ແຕ່ສະພາສູງອັງກິດໄດ້ສະເໜີໃຫ້ດັດແກ້ສອງມາດຕາ ໂດຍໄດ້ສົ່ງຍັດຕິຄືນໃຫ້ສະພາຕ່ຳເພື່ອຄົ້ນຄວ້າພິຈາລະນາ ໃໝ່.
ອີງຕາມກົດໝາຍຂອງສະຫະພາບເອີຣົບ, ຖ້າຂັ້ນຕອນການຖອນອອກຈາກສະຫະພາບເອີຣົບໄດ້ເລີ່ມດຳເນີນການແລ້ວ, ຝ່າຍຕ່າງໆທີ່ກ່ຽວຂ້ອງຕ້ອງສຳເລັດການເຈລະຈາພາຍໃນ 2 ປີ ແລະຖ້າຈຳເປັນຕ້ອງໄດ້ແກ່ຍາວເວລາການເຈລະຈາ, ຄວນໄດ້ຮັບຄວາມເຫັນດີຢ່າງເປັນເອກະພາບຈາກ 27 ປະເທດສະມາຊິກຂອງສະຫະພາບເອີຣົບ.
 |
