ທ່ານຈື່ສຸຜິງ ຫົວໜ້າອົງການຕິດຕາມກວດກາຄຸນນະພາບແລະກັກກັນແຫ່ງຊາດຈີນ ກ່າວໃນວັນທີ 14 ມີນານີ້ວ່າ ຈີນໄດ້ຖືເອົາການເພີ່ມທະວີການຮ່ວມມືກວດກາຄຸນນະພາບກັບອາຊຽນເປັນທິດທາງບຸລິມະສິດມາໂດຍຕະຫຼອດ.
ທ່ານຈື່ສຸຜິງ ກ່າວວ່າ: ຈີນແລະອາຊຽນໄດ້ສ້າງກົນໄກກອງປະຊຸມລັດຖະມົນຕີກວດກາຄຸນນະພາບແລະກັກກັນ ທັງດຳເນີນການຮ່ວມມືທາງມະຫາພາກແລະຍຸດທະສາດ. ໃນ 3 ປີຜ່ານມາ, ສອງຝ່າຍໄດ້ເຊັນສັນຍາການກວດກາຄຸນນະພາບແລະກັກກັນຜະລິດຕະພັນກະສິກຳກໍຄືອາຫານຫຼາຍກວ່າ 20 ສະບັບ, ທັງໄດ້ເພີ່ມທະວີພື້ນຖານການຮ່ວມມືດ້ານເຕັກນິກຄຸນນະພາບ ໂດຍການກໍ່ສ້າງ 6 ສູນຮ່ວມມືໃຫຍ່ຈີນ-ອາຊຽນທາງຄຸນນະພາບ, ການຫັນເປັນມາດຕະຖານ, ການວັດແທກ, ການຢັ້ງຢືນແລະກວດກາຄຸນນະພາບ ແລະອື່ນໆ ຢູ່ເມືອງໜານໜິງ ເຂດກວາງຊີ ສປຈີນ ທັງຍົກລະດັບວິຊາສະເພາະໃຫ້ແກ່ເຈົ້າໜ້າທີ່ທີ່ກ່ຽວຂ້ອງຂອງປະເທດໃນອາຊຽນ.
ທ່ານຈື່ສຸຜິງ ກ່າວຕື່ມວ່າ: ໃນຕໍ່ໜ້າ, ຈີນຈະເພີ່ມທະວີການຮ່ວມມືກັບອາຊຽນໃນການກວດກາຄຸນນະພາບຕື່ມອີກ ໂດຍສະເພາະຈະເສີມຂະຫຍາຍບົດບາດຂອງເຂດກວາງຊີ ແລະ ແຂວງຢຸນນານ ທີ່ຕິດກັບປະເທດໃນອາຊຽນ.
