ຂປລ. ກະຊວງໂຍທາທິການ ແລະ ຂົນສົ່ງ ແຫ່ງ ສປປ ລາວ ຮ່ວມກັບ ກະຊວງສິ່ງແວດ ລ້ອມ ແຫ່ງ ປະເທດຍີ່ປຸ່ນ, SLoCaT, UNESCAP, UNOSD ແລະ UNCRD ຈັດກອງປະຊຸມ ເພື່ອປຶກສາຫາລືຮ່ວມກັນ ໃນຫລາຍບັນຫາ ໂດຍສະເພາະແມ່ນການຂົນສົ່ງແບບຍືນຍົງ ແລະ ເປັນມິດຕໍ່ສິ່ງແວດລ້ອມ ໃນວັນທີ 14 ມີນາ 2017, ຢູ່ນະຄອນຫລວງວຽງຈັນ ໂດຍພາຍໃຕ້ຄຳຂວັນ "ແຜນດຳເນີນການ ວ່າດ້ວຍການຂົນສົ່ງແບບຍືນຍົງ ຮອດປີ 2030 ທີ່ສອດຄ່ອງກັບ ແຜນພັດທະນາແບບຍືນຍົງ" ໂດຍມີ ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ແຫ່ງ ສປປ ລາວ, ບັນດາຜູ້ນຳລະດັບສູງ ຈາກບັນດາປະເທດ ໃນອາຊີ-ປາຊີຟິກ ທັງໝົດ 46 ປະເທດ, ອົງການຈັດຕັ້ງສາກົນ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ທ່ານ ບຸນຈັນ ສິນທະວົງ ລັດຖະມົນຕີ ກະຊວງໂຍທາທິການ ແລະ ຂົນສົ່ງ ກ່າວວ່າ: ກອງປະຊຸມໃນຄັ້ງນີ້, ບັນດາຜູ້ເຂົ້າຮ່ວມ ໄດ້ປຶກສາຫາລືກັນ ກ່ຽວກັບການມີສ່ວນຮ່ວມ ຂອງບັນດາປະເທດອາຊຽນ ທີ່ເປັນສະມາຊິກຂອງ EST ເພື່ອບັນລຸຄາດໝາຍປີ 2030 ຂອງການພັດທະນາແບບຍືນຍົງ ຫລື SDGs ໂດຍການຈັດຕັ້ງປະຕິບັດ ການຂົນສົ່ງແບບຍືນຍົງ ຂອງບັນດາປະເທດດັ່ງກ່າວ, ປຶກສາ ຫາລືກ່ຽວກັບບັນຫາຕ່າງໆ ທາງດ້ານນະໂຍບາຍ, ມາດຕະການ, ກົນໄກທາງດ້ານເຕັກໂນໂລຊີ ແລະ ການເງິນຕະຫລອດຮອດຄູ່ຮ່ວມມື ດ້ານວຽກງານການຂົນສົ່ງ ເພື່ອໃຫ້ບັນລຸເປົ້າໝາຍການພັດທະນາ ແບບຍືນຍົງ, ຫາລືດ້ານນະໂຍບາຍ ກ່ຽວກັບການເຂົ້າເຖິງຊົນນະບົດ ແລະ ເຊື່ອມຈອດກັບຊົນນະບົດ ໃນດ້ານຄວາມປອດໄພ ດ້ານອາຫານ ແລະ ລຶບລ້າງໄພອຶດຫິວ, ຫາລືກ່ຽວກັບວິທີການໃຫ້ການ ຂົນສົ່ງ ແບບຍືນຍົງ ສາມາດປະກອບສ່ວນໃນວຽກງານ ສົ່ງເສີມຄວາມເທົ່າທຽມກັນ ຂອງຍິງ-ຊາຍ ແລະ ວຽກງານຍົກສູງບົດບາດຂອງເພດຍິງ ແລະ ເດັກຍິງ, ທົບທວນຄືນຄວາມຄືບໜ້າ ແລະ ບົດ ຮຽນຂອງການຈັດຕັ້ງປະຕິບັດ ຖະແຫລງການບາງກອກ 2020 ແລະ ຖອດຖອນບາງ ບົດຮຽນອັນຈຳເປັນທີ່ໄດ້ຮັບ ເພື່ອເປັນທິດທາງ ໃຫ້ບັນດາປະເທດສະມາຊິກ EST ກ້າວໄປທາງໜ້າ ສູ່ເປົ້າໝາຍການ ພັດທະນາແບບຍືນຍົງ ໂດຍການຈັດຕັ້ງປະຕິ ບັດການຂົນສົ່ງແບບຍືນຍົງ
ໃນໂອກາດດັ່ງກ່າວ, ທ່ານ ສົມດີ ດວງດີ ກ່າວວ່າ: ສປປ ລາວ ເປັນປະເທດທີ່ກຳລັງພັດ ທະນາ ທີ່ບໍ່ມີທາງອອກສູ່ທະເລ ພວກເຮົາກໍມີສິ່ງທ້າທາຍຫລາຍຢ່າງ ໃນການຈັດຕັ້ງປະຕິບັດພື້ນຖານໂຄງລ່າງ ແລະ ຊັບພະຍາກອນມະນຸດ. ຕໍ່ກັບບັນຫາດັ່ງກ່າວ, ລັດຖະບານແຫ່ງ ສປປ ລາວ ໄດ້ກຳ ນົດນະໂຍບາຍຕ່າງໆ ເພື່ອສົ່ງເສີມການພັດທະນາເສດຖະກິດສັງຄົມ ໂດຍສະເພາະການເຊື່ອມໂຍງ ລະຫວ່າງພາກພື້ນ ແລະ ອານຸພາກພື້ນ, ການຫັນປ່ຽນປະເທດທີ່ບໍ່ມີທາງອອກສູ່ທະເລ ໃຫ້ເປັນປະເທດທີ່ມີການເຊື່ອມຈອດທາງບົກ ກັບປະເທດຕ່າງໆ ແລະ ອື່ນໆ.
 |
