ເຈົ້າໜ້າທີ່ໄອຍະການ ສ.ເກົາຫຼີ ໄດ້ຢືນຢັນຕໍ່ນັກຂ່າວໃນວັນທີ 15 ມີນານີ້ວ່າ ໄດ້ແຈ້ງໃຫ້ທ່ານນາງປັກກຸນເຮ ອະດີດປະທານາທິບໍດີຕ້ອງເຂົ້າຮັບຟັງການສືບສວນ-ສອບສວນຢູ່ພະແນກໄອຍະການສູນກາງນະຄອນຫຼວງເຊອຸນໃນວັນທີ 21 ເດືອນນີ້.
ຂ່າວແຈ້ງວ່າ, ໃນເທື່ອນີ້, ທ່ານນາງປັກກຸນເຮຈະເຂົ້າຮັບຟັງການສືບສວນຢູ່ອົງການໄອຍະການໃນຖານະເປັນຜູ້ຕ້ອງສົງໄສ, ຂະນະທີ່ເຈົ້າໜ້າທີ່ໄອຍະການແລະຄະນະສືບສວນພິເສດໄດ້ກ່າວຟ້ອງທ່ານກວ່າ 10 ຂໍ້ຫາ. ທັງໄດ້ຢືນຢັນວ່າທ່ານນາງປັກກຸນເຮເປັນຜູ້ຕ້ອງສົງໄສ ໃນການສືບສວນ-ສອບສວນເຫດການ "ຄົນສະໜິດເຂົ້າແຊກແຊງວຽກງານບໍລິຫານລັດ" ໂດຍສົງໄສໄດ້ສົມຮູ້ຮ່ວມຄິດກັບນາງຊອຍຊຸນຊິວ ໝູ່ຂອງຕົນໃນການກິນສິນບົນ ແລະ ໃຊ້ສິດອຳນາດໃນທາງບໍ່ຖືກຕ້ອງ ເປັນຕົ້ນ.
ສານລັດຖະທຳມະນູນ ສ.ເກົາຫຼີ ໄດ້ມີມະຕິຮັບຮອງການຖອດຖອນທ່ານນາງປັກກຸນເຮອອກຈາກຕຳແໜ່ງປະທານາທິບໍດີໃນວັນທີ 10 ມີນານີ້ ສົ່ງຜົນເຮັດໃຫ້ຜູ້ກ່ຽວກາຍເປັນປະທານາທິບໍດີຜູ້ທຳອິດທີ່ຖືກຖອດຖອນອອກຈາກຕຳແໜ່ງໃນປະຫວັດສາດຂອງປະເທດດັ່ງກ່າວ ທັງສູນເສຍອະພິຊິດທາງກົດໝາຍອີກດ້ວຍ.