ກອງປະຊຸມໃນຄັ້ງນີ້ ຈັດຂຶ້ນເພື່ອເປັນເວທີປຶກສາຫາລື ແລະ ແລກປ່ຽນປະສົບການ ລະຫວ່າງ ບັນດາເຈົ້າຄອງນະຄອນຫລວງ ແລະ ຜູ້ນຳທ້ອງຖິ່ນ ຂອງບັນດາປະເທດຕ່າງໆ ໃນການດຳເນີນຈັດຕັ້ງປະຕິບັດຕາມນະໂຍບາຍ ແລະ ໂຄງການພັດທະນາລະດັບທ້ອງຖິ່ນ ເພື່ອເສີມສ້າງຄວາມສຳເລັດ ໃນການສ້າງຕົວເມືອງໃຫ້ຍືນຍົງ ແລະ ສອດຄ່ອງກັບສະພາບຄວາມເປັນຈິງ ຂອງທ້ອງຖິ່ນນັ້ນໆ.
ໃນໂອກາດດັ່ງກ່າວນີ້ ບັນດາເຈົ້າຄອງນະຄອນຫລວງ ແລະ ຜູ້ນຳທ້ອງຖິ່ນ ກໍໄດ້ສະເໜີປະສົບການຄວາມສຳເລັດ ແລະ ຄວາມທ້າທາຍ ຂອງຕົວເມືອງຕົນ ພ້ອມທັງເປັນການຈັດຕັ້ງ ປະຕິບັດວິໄສທັດ ໃຫ້ບັນລຸຕົວເມືອງແບບຍືນຍົງ ໃນປີ 2030. ພ້ອມດຽວກັນ ໃນກອງປະຊຸມຍັງຈະໄດ້ປຶກສາຫາລື ກ່ຽວກັບບັນຫາຕ່າງໆ ທາງດ້ານນະໂຍບາຍ, ມາດຕະການ, ກົນໄກທາງດ້ານເຕັກໂນໂລຊີ ແລະ ທຶນຮອນ ຕະຫລອດຮອດຄູ່ຮ່ວມມືທາງດ້ານວຽກງານ ການພັດທະນາຕົວເມືອງແບບຍືນຍົງ ເປັນມິດກັບສິ່ງແວດລ້ອມ; ນອກຈາກນີ້ ຍັງໄດ້ຫາລືດ້ານນະໂຍບາຍ ການເຂົ້າເຖິງຊົນນະບົດ ແລະ ການເຊື່ອມຈອດກັບຊົນນະບົດ ໃນດ້ານຄວາມປອດໄປທາງດ້ານອາຫານ, ລຶບລ້າງການອຶດຫິວ, ການຮ່ວມມືກັບພາກພື້ນ ແລະ ການພັດທະນແບບຍືນຍົງ.