ວັນທີ 17 ມີນານີ້, ສະພາຄວາມໝັ້ນຄົງອົງການສະຫະປະຊາຊາດໄດ້ລົງຄະແນນສຽງດ້ວຍສຽງເຫັນດີ 15 ສຽງ ເຊິ່ງເປັນເອກະພາບກັນຮັບຮອງເອົາມະຕິເລກທີ 2344ກ່ຽວກັບບັນຫາອັຟການິສະຖານໂດຍຮຽກຮ້ອງປະຊາຄົມໂລກເຕົ້າໂຮມຄວາມເປັນເອກະພາບກັນຊ່ວຍເຫຼືອອັຟການິສະຖານ, ເພີ່ມທະວີການຮ່ວມມືເສດຖະກິດໃນພາກພື້ນເປັນຕົ້ນ ການກໍ່ສ້າງ "ໜຶ່ງແລວທາງໜຶ່ງເສັ້ນທາງ" ແລະອື່ນໆ, ຊຸກຍູ້ໃຫ້ບັນດາຝ່າຍສ້າງສະພາບແວດລ້ອມເພື່ອຮັບປະກັນຄວາມໝັ້ນຄົງໃຫ້ແກ່ການກໍ່ສ້າງ "ໜຶ່ງແລວທາງໜຶ່ງເສັ້ນທາງ"ພ້ອມດ້ວຍເພີ່ມທະວີການເຊື່ອມຕໍ່ນະໂຍບາຍແລະຍຸດທະສາດການພັດທະນາ, ສົ່ງເສີມການຮ່ວມມືຕົວຈິງໃນດ້ານການເຊື່ອມໂຍງແລະເຊື່ອມຈອດກັນແລະອື່ນໆ. ມະຕິດັ່ງກ່າວເນັ້ນວ່າ: ຄວນປະຕິບັດຕາມຈິດໃຈຮ່ວມມືແບບຕ່າງຝ່າຍຕ່າງມີຜົນປະໂຫຍດໃນການຊຸກຍູ້ການຮ່ວມມືໃນພາກພື້ນເພື່ອປະກອບສ່ວນອັນສຳຄັນເຂົ້າໃນການສົ່ງເສີມຄວາມໝັ້ນຄົງ,ສະຖຽນລະພາບແລະການພັດທະນາຂອງອັຟການິສະຖານກໍຄືພາກພື້ນ ແລະສ້າງປະຊາຄົມຮ່ວມຊະຕາກຳມວນນະນຸດ.
ຫຼັງສະພາຄວາມໝັ້ນຄົງຜ່ານມະຕິດັ່ງກ່າວ, ທ່ານຫຼິວເຈຢີ່ ຜູ້ຕາງໜ້າຖາວອນຂອງຈີນປະຈຳອົງການສະຫະປະຊາຊາດໄດ້ຢືນຢັນຕໍ່ສື່ມວນຊົນວ່າ: ເດືອນມັງກອນປີນີ້ ທ່ານສີຈິ້ນຜິງ ປະທານປະເທດຈີນໄດ້ກ່າວປາຖະກະຖາທີ່ສຳຄັນຢູ່ສຳນັກງານໃຫຍ່ອົງການສະຫະປະຊາຊາດທີ່ເຊີແນວ ປະເທດສວິສໂດຍໄດ້ລົງເລິກບັນຍາຍທັດສະນະຄະຕິກ່ຽວກັບການກໍ່ສ້າງປະຊາຄົມຮ່ວມຊະຕາກຳມວນມະນຸດ ເຊິ່ງໄດ້ສະເໜີແຜນການແບບຈີນເພື່ອຊຸກຍູ້ການພັດທະນາຂອງໂລກແລະຄວາມກ້າວໜ້າຂອງອະລິຍະທຳມະນຸດ. ເທື່ອນີ້, ສະພາຄວາມໝັ້ນຄົງອົງການສະຫະປະຊາຊາດເປັນເອກະພາບກັນຮັບຮອງເອົາມະຕິເລກທີ 2344 ແລະເປັນເທື່ອທຳອິດທີ່ໄດ້ບັນທຶກທັດສະນະຄະຕິສຳຄັນກ່ຽວກັບການກໍ່ສ້າງປະຊາຄົມຮ່ວມຊະຕາກຳມວນມະນຸດ ເຊິ່ງໄດ້ສະແດງໃຫ້ເຫັນຄວາມຮັບຮູ້ທີ່ເປັນເອກະພາບກັນຂອງປະຊາຄົມໂລກ ທັງສ່ອງແສງໃຫ້ເຫັນເຖິງທັດສະນະຄະຕິຈີນແລະແຜນການແບບຈີນທີ່ໄດ້ປະກອບສ່ວນອັນສຳຄັນເຂົ້າໃນການຄຸ້ມຄອງທົ່ວໂລກ.
 |
