ຕອນເຊົ້າວັນທີ 17 ມີນານີ້, ທ່ານຫຼີເຄີ້ຊຽງ ນາຍົກລັດຖະມົນຕີຈີນໄດ້ພົບປະສົມເດັດຊາວມັນ ບິນ ອັບດູລາຊີສ ອັນ ຊາອຸດ ເຈົ້າຊີວິດອາຣັບບີຊາອຸດິດທີ່ມາຢ້ຽມຢາມຈີນທາງລັດຖະກິດ.
ທ່ານຫຼີເຄີ້ຊຽງກ່າວວ່າ, ຈີນກັບອາຣັບຊາອຸດິດມີພື້ນຖານຄວາມໄວ້ເນື້ອເຊື່ອໃຈທາງການເມືອງທີ່ໝັ້ນໜາ, ມີໝາກຜົນການຮ່ວມມືທີ່ແທດເໝາະກັບຕົວຈິງທີ່ອຸດົມສົມບູນ. ຝ່າຍຈີນໂຄລົບບັນດາປະເທດເລືອກເສັ້ນທາງພັດທະນາໂດຍອີງຕາມສະພາບຕົວຈິງຂອງຕົນ, ສະໜັບສະໜູນຄວາມພະຍາຍາມຂອງອາຣັບບີຊາອຸດິດທີ່ຮັກສາຄວາມສະຖຽນລະພາບຂອງປະເທດຕົນ, ຍິນດີປັບປຸງຄວາມໄວ້ເນື້ອເຊື່ອໃຈເຊິ່ງກັນແລະກັນໃຫ້ໝັ້ນຄົງກວ່າເກົ່າ, ລົງເລິກເຊື່ອມຕໍ່ຍຸດທະສາດພັດທະນາ, ຈັດຕັ້ງປະຕິບັດການຮ່ວມມືດ້ານຄວາມສາມາດການຜະລິດໃນຂົງເຂດສຳຄັນ, ເປີດຊ່ອງຫວ່າງໃໝ່ຂອງການຮ່ວມມືໃນດ້ານພະລັງງານແລະເຕັກນິກສູງ, ເພີ່ມທະວີການປະສານງານວຽກງານພາກພື້ນກໍຄືສາກົນ, ຊຸກຍູ້ການພົວພັນລະຫວ່າງຈີນກັບອາຣັບບີຊາອຸດິດແລະການຮ່ວມມືໃນຂົງເຂດທີ່ກວ້າງຂວາງໄດ້ຮັບການພັດທະນາອັນໃໝ່.
ທ່ານຫຼີເຄີ້ຊຽງຊີ້ອອກວ່າ, ການພັດທະນາເສດຖະກິດແລະປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນນັ້ນຕ້ອງການສະພາບແວດລ້ອມທີ່ມີສັນຕິພາບແລະສະຖຽນລະພາບ. ພາຍໃຕ້ເບື້ອງຫຼັງທີ່ການເມືອງເສດຖະກິດສາກົນບໍ່ຄັກແນ່ແລະບໍ່ໝັ້ນທ່ຽງຢ່າງພົ້ນເດັ່ນ, ຝ່າຍຈີນຍິນດີເພີ່ມທະວີການຮ່ວມມືກັບບັນດາປະເທດທີ່ລວມທັງອາຣັບບີຊາອຸດິດ, ເພື່ອຮັບມືກັບຄວາມສ່ຽງແລະການທ້າທາຍຊະນິດຕ່າງໆ, ປົກປັກຮັກສາສັນຕິພາບແລະຄວາມໝັ້ນຄົງຂອງໂລກ, ຊຸກຍູ້ການພັດທະນາແລະການຮ່ວມມື.
ສົມເດັດຊາວມັນກ່າວວ່າ, ມິດຕະພາບລະຫວ່າງອາຣັບບີຊາອຸດິດກັບຈີນມີປະຫວັດສາດມາຍາວນານ, ສອງປະເທດມີຄວາມຮັບຮູ້ຄືກັນຢ່າງກວ້າງຂວາງໃນການຮ່ວມມືທີ່ແທດເໝາະກັບຕົວຈິງ. ອາຣັບບີຊາອຸດິດມີຄວາມໝັ້ນໃຈຢ່າງເຕັມປ່ຽມຕໍ່ອານະຄົດການຮ່ວມມືລະຫວ່າງສອງປະເທດ, ຍິນດີສືບຕໍ່ເສີມຂະຫຍາຍບົດບາດຂອງຄະນະກຳມະການຮ່ວມຊັ້ນສູງ, ເພີ່ມທະວີການຮ່ວມມືທີ່ແທດເໝາະກັບຕົວຈິງໃນຂົງເຂດຕ່າງໆ, ຮ່ວມຮັບມືຕໍ່ການຂົ່ມຂູ່ຈາກລັດທິການກໍ່ການຮ້າຍແລະອິດທິກຳລັງຫົວຮຸນແຮງ, ປົກປັກຮັກສາສັນຕິພາບແລະສະຖຽນລະພາບຂອງພາກພື້ນແລະຂອງໂລກໃຫ້ດີກວ່າເກົ່າ.
