ເຈົ້າໜ້າທີ່ຕຳຫຼວດໄທຢືນຢັນໃນວັນທີ 20 ມີນານີ້ວ່າ: ກຸ່ມຕໍ່ຕ້ານລັດຖະບານກຸ່ມໜຶ່ງມີເຈຕະນາລອບສັງຫານທ່ານປຣະຍຸດ ຈັນໂອຊາ ນາຍົກລັດຖະມົນຕີ ຂະນະທີ່ເຈົ້າໜ້າທີ່ຕຳຫຼວດໄດ້ຍຶດອາວຸດຜິດກົດໝາຍໄດ້ຊຸດໜຶ່ງ ທັງໄດ້ດຳເນີນການສືບສວນສອບສວນແລ້ວ. ທັງນີ້ ໃນວັນທີ 20 ມີນານີ້, ໂຄສົກຕຳຫຼວດໄທໄດ້ໃຫ້ສຳພາດຕໍ່ສື່ມວນຊົນວ່າ ມີຫຼັກຖານແທ້ຈິງທີ່ສາມາດຢັ້ງຢືນໃຫ້ເຫັນວ່າ ກຸ່ມຕໍ່ຕ້ານລັດຖະບານມີເຈຕະນາໃຊ້ອາວຸດກໍ່ເຫດດ້ວຍຄວາມຮຸນແຮງທັງຈະລອບສັງຫານຜູ້ນຳລັດຖະບານ.
ຂ່າວສານຣອຍເຕີລາຍງານວ່າ: ຜົນການສືບສວນຂອງເຈົ້າໜ້າທີ່ຕຳຫຼວດສະແດງໃຫ້ເຫັນວ່າ ອາວຸດທີ່ຍຶດມາໄດ້ນັ້ນເປັນຂອງກຸ່ມແນວໂຮມປະຊາທິປະໄຕ ຕໍ່ຕ້ານຜະເດັດການແຫ່ງຊາດຫຼືກຸ່ມເສື້ອແດງ. ທັງນີ້ຫຼັງທ່ານທັກສິນຊິນນະວັດ ອະດີດນາຍົກລັດຖະມົນຕີຖືກໂຄ່ນລົ້ມເມື່ອປີ2006, ກຸ່ມເສື້ອແດງກໍໄດ້ເລີ່ມການເຄື່ອນໄຫວຕໍ່ຕ້ານຕ່າງໆແລະຕໍ່ມາກໍຖືກປະກາດເປັນການເຄື່ອນໄຫວຜິດກົດໝາຍ.
ທ່ານຈັກທິບ ໄຊຈິນດາ ຜູ້ບັນຊາການໃຫຍ່ຕຳຫຼວດແຫ່ງຊາດໄທໄດ້ຢືນຢັນຕໍ່ສື່ມວນຊົນໃນວັນທີ 20 ມີນານີ້ ວ່າ ອາວຸດເຫຼົ່ານີ້ບໍ່ແມ່ນໃຊ້ເພື່ອຍິງນົກ ຫາກແມ່ນໃຊ້ເພື່ອລອບສັງຫານຜູ້ນຳປະເທດ.