ອີຢູຈະຮັບຮອງທິດທາງຊີ້ນຳການຖອນໂຕຂອງອັງກິດ

ທ່ານໂດນານ ຕຸສກ໌ ປະທານສະພາມົນຕີເອີຣົບຖະແຫຼງໃນວັນທີ 21 ມີນານີ້ວ່າ: ຜູ້ນຳ 27 ປະເທດສະມາຊິກສະຫະພາບເອີຣົບຫຼືອີຢູຍົກເວັ້ນອັງກິດຈະເຂົ້າຮ່ວມກອງປະຊຸມສຸດຍອດສະໄໝວິສາມັນທີ່ຈະຈັດຂຶ້ນໃນວັນທີ 29 ເດືອນໜ້ານີ້ໂດຍຈະຮັບຮອງເອົາທິດທາງຊີ້ນຳກ່ຽວກັບອັງກິດຖອນອອກຈາກອີຢູ.

ທ່ານຕຸສກ໌ຢືນຢັນວ່າ ວຽກບຸລິມະສິດສຳຄັນຂອງສະຫະພາບເອີຣົບໃນການດຳເນີນການເຈລະຈາກ່ຽວກັບອັງກິດຖອນອອກຈາກອີຢູນັ້ນກໍຄືສ້າງຄວາມແນ່ນອນແລະຄວາມຈະແຈ້ງໃຫ້ໄດ້ຫຼາຍເທົ່າທີ່ຈະຫຼາຍໄດ້ເພື່ອແຈ້ງຕໍ່ພົນລະເມືອງ,ບໍລິສັດ,ປະເທດສະມາຊິກພ້ອມດ້ວຍຄູ່ຮ່ວມມືແລະເພື່ອນມິດຂອງອີຢູທີ່ຈະໄດ້ຮັບຜົນກະທົບທາງລົບຈາກການຖອນອອກຈາກອີຢູຂອງອັງກິດ.