ກ່ອນໜ້ານີ້ບໍ່ດົນ, ເຕົ່າທະເລໂຕໜຶ່ງທີ່ມີອາຍຸ 25 ປີຢູ່ໜອງນ້ຳແຫ່ງໜຶ່ງຂອງປະເທດໄທໄດ້ດຶງດູດຄວາມສົນໃຈຈາກສັງຄົມເນື່ອງຈາກໃນທ້ອງຂອງມັນເຕັມໄປດ້ວຍເງິນຫຼຽນຂອງປະເທດຕ່າງໆແລະກໍເປັນເງິນທີ່ໄດ້ຈາກການອະທິຖານຂໍພອນຂອງນັກທ່ອງທ່ຽວ ແລະເຕົ່າໂຕນີ້ຖືກສົ່ງໄປປົວຢູ່ພະແນກສັດຕະວະແພດມະຫາວິທະຍາໄລຈຸລາລົງກອນປະເທດໄທ.
ຫຼັງການຜ່າຕັດ, ທ່ານໝໍໄດ້ເອົາເງິນຫຼຽນປະເທດຕ່າງໆ 915 ຫຼຽນໜັກປະມານ 5 ກິໂລອອກຈາກທ້ອງເຕົ່າ. ສຳລັບການຜ່າຕັດນັ້ນກໍໄດ້ໃຊ້ເວລາເຖິງ 7 ຊົ່ວໂມງ ແລະສະເພາະແຕ່ການເອົາເງິນຫຼຽນອອກຈາກທ້ອງນັ້ນກໍໄດ້ໃຊ້ເວລາເຖິງ 4 ຊົ່ວໂມງ.
ສິ່ງທີ່ໜ້າເສຍດາຍນັ້ນຄື ວັນທີ 19 ມີນານີ້ ສຸຂະພາບຂອງເຕົ່າໂຕນີ້ຊຸດໂຊມລົງກະທັນຫັນ, ທ່ານໝໍຈິ່ງຈຳເປັນຕ້ອງຜ່າຕັດເປັນເທື່ອທີສອງ, ແຕ່ດ້ວຍມີອາການເຈັບໜັກແລະບໍ່ສາມາດປິ່ນປົວໄດ້ມັນຈິ່ງຕາຍໃນວັນທີ 21 ມີນານີ້. ທ່ານໝໍຮັບຜິດຊອບປິ່ນປົວເຕົ່າໂຕນີ້ກ່າວດ້ວຍສຽງສະອື້ນໃນພິທີຖະແຫຼງຂ່າວວ່າ ຫວັງວ່າການຕາຍຂອງ "ເຕົ່າຖັງເງິນ"ຈະເຮັດໃຫ້ທົ່ວປະເທດກໍຄືທົ່ວໂລກເອົາໃຈໃສ່ຕໍ່ເລື່ອງນີ້.