ຕາມຂ່າວສານຈີນ:ວັນທີ 23 ມີນານີ້,ທ່ານໂຈໂຄ ວີໂດໂດ ປະທານາທິບໍດີອິນໂດເນເຊຍທີ່ກຳລັງເຄື່ອນໄຫວຢ້ຽມຢາມເກາະດອນພາກຕາເວັນຕົກປະເທດຕົນໄດ້ຖະແຫຼງຂ່າວຫຼັງເກີດເຫດກໍ່ການຮ້າຍໃກ້ຫໍລັດຖະສະພາໃຈກາງນະຄອນຫຼວງລອນດອນປະເທດອັງກິດໂດຍຂໍປະນາມຢ່າງຮຸນແຮງຕໍ່ການກະທຳຂອງລັດທິກໍ່ການຮ້າຍທຸກຮູບແບບ.
ຖະແຫຼງຂ່າວດັ່ງກ່າວທີ່ສື່ອິນໂດເນເຊຍລາຍງານນັ້ນໄດ້ລະບຸວ່າ,ທ່ານໂຈໂຄສະແດງຄວາມເຫັນໃຈລັດຖະບານແລະປະຊາຊົນອັງກິດໂດຍສະເພາະຜູ້ປະສົບເຄາະຮ້າຍພ້ອມທັງຮຽກຮ້ອງປະຊາຄົມໂລກສາມັກຄີກັນຕໍ່ຕ້ານການຂົ່ມຂູ່ຈາກລັດທິກໍ່ການຮ້າຍ.
ທ່ານໂຈໂຄເນັ້ນວ່າ,ອີກເທື່ອໜຶ່ງ,ອິນໂດເນເຊຍຮຽກຮ້ອງໃຫ້ປະເທດຕ່າງໆຈົ່ງຮ່ວມມືກັນຢ່າງຮອບດ້ານໃນການຕໍ່ຕ້ານລັດທິກໍ່ການຮ້າຍແລະປະເທດຕົນກໍຖືກຂົ່ມຂູ່ຢ່າງໜັກໜ່ວງຈາກລັດທິກໍ່ການຮ້າຍໂດຍເຫັນໄດ້ໃນຫຼາຍປີມານີ້ໄດ້ເກີດເຫດການກໍ່ການຮ້າຍມາແລ້ວຫຼາຍເທື່ອ.