ວັນທີ 25 ມີນານີ້,ສະຖານທູດລາວປະຈຳສປ ຈີນໄດ້ຈັດພິທີສະເຫລີມສະຫລອງ ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 62 ປີຂຶ້ນທີ່ນະຄອນຫລວງປັກກິ່ງ, ໂດຍການເປັນປະທານ ຂອງສະຫາຍ ນ. ວັນດີ ບຸດທະສະວົງ ເລຂາໜວ່ຍພັກ, ທັງເປັນເອກອັກຄະລັດຖະທູດລາວ ປະຈຳ ສປຈີນ. ມີຄະນະນຳສະຖານທູດ ພອ້ມດວ້ຍ ສະມາຊິກພັກສົມບູນ ແລະ ສຳຮອງເຂົ້າຮວ່ມ 55 ສະຫາຍ.
ໃນພິທີສຳຄັນນີ້, ສະຫາຍ ນ. ວັນດີ ບຸດທະສະວົງ ໄດ້ຍົກໃຫ້ເຫັນ ເຖິງການກຳເນີດ ແລະ ການເຕີບໃຫຍ່ຂະຫຍາຍຕົວ ຂອງພັກປະຊາຊົນ ປະຕິວັດລາວ ຕະຫລອດໄລຍະ 62 ປີຜ່ານມາວ່າ: ນັບແຕ່ໄດ້ຮັບການ ສ້າງຕັ້ງຂຶ້ນໃນວັນທີ22ມີນາ ປີ 1955 ເປັນຕົ້ນມາ, ພັກປະຊາຊົນ ປະຕິວັດລາວ ກໍ່ໄດ້ສືບທອດອຸດົມການ ຍິ່ງໃຫຍ່ຂອງພັກ ກອມມູນິດອິນດູຈີນ, ພັກໄດ້ກໍານົດທາດແທ້, ອຸດົມການ ແລະ ແນວທາງການ ເມືອງ ຂອງຕົນອອກ ຢ່າງຈະແຈ້ງ ເພື່ອນໍາພາ ທົ່ວປວງຊົນລາວ ຕໍ່ສູ້ກູ້ຊາດ ຕ້ານຈັກກະພັດ ຕ່າງດ້າວຜູ້ຮຸກຮານ ຍາດເອົາເອກກະລາດ ມາໃຫ້ແກ່ປະເທດຊາດ ແລະ ປະຊາຊົນ ໄດ້ຢ່າງສົມບູນ ໃນວັນທີ 2 ທັນວາປີ 1975, ນໍາພາປະຊາຊົນ ປົກປັກຮັກສາ ແລະ ພັດທະນາປະເທດຊາດ ເຮັດໃຫ້ປະຊາຊົນ ຮັ່ງມີຜາສຸກ, ປະເທດຊາດ ມັ່ງຄັ່ງເຂັ້ມແຂງ, ສັງຄົມສາມັກຄີ ປອງດອງ, ປະຊາທິປະໄຕ, ຍຸຕິທໍາ ແລະ ສີວິໄລ; ເຮັດໃຫ້ອຸດົມການ ຂອງພັກ ປະກົດເປັນຈິງ ຂຶ້ນຢ່າງເດັ່ນຊັດ ໃນແຕ່ ລະໄລຍະ.
ຫລັງຈາກນັ້ນ,ຜູ້ເຂົ້າຮວ່ມກໍ່ໄດ້ເຊື່ອມຊຶມເອກະສານສຳຄັນ ຂອງພັກ, ລັດຖະບານ ໂດຍສະເພາະ ເອກະສານການຮັບຮູ້ ແລະ ເຫັນແຈ້ງໝາກຜົນ ການຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ IX ຂອງພັກ, ກຳແໜ້ນທິດທາງ ແລະ ໜ້າທີ່ຕົ້ນຕໍ ໃນການປົກປັກຮັກສາ ແລະ ພັດທະນາປະເທດຊາດ ໄລຍະ 5 ປີ ຕໍ່ໜ້າ ແລະ ເອກະສານການຍົກສູງ ຄວາມສາມາດນຳພາ, ກຳລັງແຮງສູ້ຮົບ ທີ່ມີ ລັກສະ ນະນຳພາຂອງພັກ ແລະ ເອກະສານສຳຄັນຕ່າງໆອີກຈຳນວນໜຶ່ງ.
