ວັນທີ 27 ມີນານີ້, ຢູ່ນະຄອນຫຼວງຈາກາຕາປະເທດອິນໂດເນເຊຍ, ບໍລິສັດຮວາເຫວີຍຈີນປະຈຳປະເທດດັ່ງກ່າວໄດ້ເຊັນບົດບັນທຶກຄວາມເຂົ້າໃຈກັບໂຮງຮຽນຊັ້ນສູງທີ່ມີຊື່ສຽງ 7 ແຫ່ງເຊັ່ນ: ມະຫາວິທະຍາໄລອິນໂດເນເຊຍແລະວິທະຍາໄລວິທະຍາສາດ-ການຊ່າງບັນດຸງອິນໂດເນເຊຍເປັນຕົ້ນ ເພື່ອໄດ້ເລີ່ມໂຄງການຊ່ວຍເຫຼືອສັງຄົມຂອງວິສາຫະກິດ SmartGen ທີ່ບໍລິສັດຮວາເຫວີຍນຳສະເໜີ ຫວັງຊ່ວຍສ້າງບຸກຄະລາກອນຂໍ້ມູນຂ່າວສານແລະໂທລະຄົມ.
ທ່ານ ຣູດຽນຕາຣາ ລັດຖະມົນຕີກະຊວງໂທລະຄົມອິນໂດເນເຊຍໄດ້ກ່າວສະແດງຄວາມຂອບໃຈບໍລິສັດຮວາເຫວີຍຈີນທີ່ໄດ້ອົບຮົບສ້າງບຸກຄະລາກອນດ້ານໂທລະຄົມແລະເຕັກນິກ ແລະຊ່ວຍປະເທດຕົນຮັບມືກັບສິ່ງທ້າທາຍຈາກການຫັນເປັນແບບດີຈີຕອນ. ທ່ານ ໄອໂນ ເລຂາລັດຖະມົນຕີກະຊວງການສຶກສາຊັ້ນສູງອິນໂດເນເຊຍໄດ້ສະແດງຄວາມຊົມເຊີຍແລະສະໜັບສະໜູນຕໍ່ການຮ່ວມມືລະຫວ່າງບໍລິສັດຮວາເຫວີຍກັບບັນດາໂຮງຮຽນຊັ້ນສູງດັ່ງກ່າວ.
ຕາມຂ່າວແຈ້ງວ່າ: ພະນັກງານບໍລິສັດຮວາເຫວີຍຢູ່ອິນໂດເນເຊຍເກືອບ 90% ເປັນຄົນອິນໂດເນເຊຍ ແລະຢູ່ປະເທດນີ້ໄດ້ມີຄູ່ຮ່ວມມືຫຼາຍກວ່າ 400 ແຫ່ງ ເຊິ່ງໄດ້ສ້າງວຽກເຮັດງານທຳດ້ານເຕັກໂນໂລຊີທີ່ກ້າວໜ້າໃຫ້ແກ່ຂະແໜງການໂທລະຄົມອິນໂດເນເຊຍຫຼາຍກວ່າ 2 ໝື່ນຕຳແໜ່ງ.