ຕອນທ່ຽງວັນທີ 28 ມີນານີ້, ທ່ານຫຼີເຄີ້ສຽງ ນາຍົກລັດຖະມົນຕີຈີນທີ່ກຳລັງຢ້ຽມຢາມນູແວນເຊລັງຢ່າງເປັນທາງການໄດ້ຮ່ວມກັບທ່ານບິວ ອິງກລິສ ນາຍົກລັດຖະມົນຕີນູແວນເລຊັງເຂົ້າຮ່ວມງານລ້ຽງຮັບຮອງທີ່ວົງການຕ່າງໆຂອງປະເທດດັ່ງກ່າວຈັດຂຶ້ນຢ່າງສົມກຽດຢູ່ໂຮງແຮມທີ່ພັກຂອງເມືອງອົກແລນຢ່າງສົມກຽດໂດຍບຸກຄົນໃນວົງການການເມືອງ,ນັກທຸລະກິດແລະນັກຮຽນນັກສຶກສາໄດ້ເຂົ້າຮ່ວມ 500 ກວ່າຄົນ.
ໂອກາດກ່າວຄຳປາໄສໃນງານລ້ຽງດັ່ງກ່າວ, ທ່ານຫຼີເຄີ້ສຽງຊີ້ໃຫ້ເຫັນວ່າ: ເສດຖະກິດໂລກາພິວັດທີ່ເນັ້ນການຄ້າແລະການລົງທຶນທີ່ເສລີນັ້ນຄືແມ່ແຮງສຳຄັນໃນການຊຸກຍູ້ໃຫ້ເສດຖະກິດໂລກຂະຫຍາຍຕົວຢ່າງວ່ອງໄວ.ຈີນຖືທ່າທີເປີດປະຕູຕໍ່ການກຳນົດການຄ້າເສລີທີ່ມີຜົນດີຕໍ່ການສົ່ງເສີມການເຊື່ອມໂຍງເຂົ້າເປັນອັນດຽວກັນຂອງເສດຖະກິດພາກພື້ນ. ຈີນ-ນູແວນເຊລັງຈະຮ່ວມກັນຊຸກຍູ້ການເປີດກວ້າງແລະຍົກລະດັບການຄ້າສອງຝ່າຍທັງສືບຕໍ່ຮັດແໜ້ນການແລກປ່ຽນດ້ານວັດທະນະທຳເພື່ອເຮັດໃຫ້ມິດຕະພາບສອງປະເທດຊຶມເລິກເຖິງຈິດໃຈຂອງປະຊາຊົນຫຼາຍກວ່າເກົ່າແລະສືບທອດກັນໄປໃນແຕ່ລະເຊັ່ນຄົນ.
ທ່ານອິງກລິສຢືນຢັນວ່າ ການຢ້ຽມຢາມຂອງທ່ານນາຍົກຫຼີເຄີ້ສຽງເທື່ອນີ້ຈະປະກອບສ່ວນ ເຂົ້າໃນການຊຸກຍູ້ການຂະຫຍາຍຕົວຂອງສາຍພົວພັນນູແວນເຊລັງ-ຈີນແລະການຮ່ວມມືຕົວຈິງໃນຂົງເຂດຕ່າງໆຢ່າງຫຼວງຫຼາຍ ແລະນູແວນເຊລັງຍິນດີສືບຕໍ່ເສີມຂະຫຍາຍສາຍພົວພັນພິເສດກັບຈີນ ແລະສຸມທຸກຄວາມພະຍາຍາມຢ່າງຕໍ່ເນື່ອງເພື່ອອະນາຄົດຂອງສອງປະເທດກໍຄືສັນຕິພາບ,ສະເຖຍລະພາບແລະການພັດທະນາທີ່ຈະເລີນຮຸ່ງເຮືອງຂອງພາກພື້ນອາຊີປາຊີຟິກ.