ຕາມຂ່າວCRI: ໃນວັນທີ 29 ຫາວັນທີ 30 ມີນານີ້ຕາມເວລາທ້ອງຖິ່ນ, ທ່ານ ຫວ່າງຢາງ ຮອງນາຍົກລັດຖະມົນຕີຈີນໄດ້ເຂົ້າຮ່ວມກອງປະຊຸມເວທີປຶກສາຫາລືຂົ້ວໂລກເໜືອສາກົນ "ຂົ້ວໂລກເໜືອ - ພາກພື້ນແຫ່ງການເຈລະຈາ" ຄັ້ງທີ 4 ທີ່ຈັດຂຶ້ນຢູ່ເມືອງອັກຮານເກນຂອງຣັດເຊຍຕາມຄຳເຊີນ. ຂະນະທີ່ຜູ້ຕາງໜ້າວົງການການເມືອງ,ການຄ້າແລະນັກວິຊາການຈາກ 30 ປະເທດເຊັ່ນ: ອາເມລິກາ, ການາດາ, ແຟງລັງ, ດານມາກ, ນັອກແວ ແລະ ອິສລັງເປັນຕົ້ນ 3.000 ກວ່າທ່ານກໍໄດ້ເຂົ້າຮ່ວມກອງປະຊຸມເຊັ່ນດຽວກັນ.
ທ່ານ ຫວ່າງຢາງ ກ່າວວ່າ: ຈີນແມ່ນປະເທດທີ່ມີສ່ວນກ່ຽວຂ້ອງກັບຜົນປະໂຫຍດທີ່ສຳຄັນໃນວຽກງານຂອງຂົ້ວໂລກເໜືອແລະໄດ້ເຂົ້າຮ່ວມວຽກງານຂົ້ວໂລກເໜືອຕາມກົດໝາຍມາແຕ່ດົນແລ້ວ. ຂະນະດຽວກັນກໍຍັງແມ່ນຜູ້ເຂົ້າຮ່ວມ,ຜູ້ກໍ່ສ້າງແລະຜູ້ປະກອບສ່ວນໃນວຽກງານຂອງຂົ້ວໂລກເໜືອ ທັງມີຄວາມສາມາດເສີມຂະຫຍາຍບົດບາດທີ່ໃຫຍ່ຫຼວງກວ່າເກົ່າຕໍ່ການພັດທະນາແລະການຮ່ວມມືຂອງຂົ້ວໂລກເໜືອ. ພ້ອມນີ້ກໍໄດ້ຍຶດໝັ້ນ 3 ນະໂຍບາຍຄື: ຄວາມເຄົາລົບ,ການຮ່ວມມື,ການພັດທະນາແບບຍືນຍົງ ຂະນະທີ່ເຂົ້າຮ່ວມວຽກງານຂົ້ວໂລກເໜືອ ທັງຍິນດີຮ່ວມກັບບັນດາປະເທດລົງເລິກການແລກປ່ຽນ,ເປີດກວ້າງການຮ່ວມມື ເພື່ອຮ່ວມກັນສ້າງອະນາຄົດໃໝ່ທີ່ດີຂອງຂົ້ວໂລກເໜືອ.