ຕາມຂ່າວສານຊິນຮວາ: ທ່ານ ອາຣີເອັຟ ຢາເຮຢາ ລັດຖະມົນຕີກະຊວງທ່ອງທ່ຽວອິນໂດເນເຊຍ ກ່າວໃນວັນທີ 29 ມີນານີ້ວ່າ, ປະເທດຕົນໄດ້ ແລະຈະສືບຕໍ່ຮ່ວມກັບສະຖານທູດແລະສະຖານກົງສຸນຈີນປະຈຳປະເທດຕົນ ເພື່ອປົກປັກຮັກສາຄວາມປອດໄພແລະສິດທິຜົນປະໂຫຍດທີ່ຊອບດ້ວຍກົດໝາຍຂອງນັກທ່ອງທ່ຽວຈີນຢູ່ປະເທດຕົນ, ພ້ອມທັງໃຫ້ການບໍລິການທີ່ສະດວກແລະດີກວ່າເກົ່າ ແລະສ້າງຄວາມເຊື່ອໝັ້ນໃຫ້ແກ່ນັກທ່ອງທ່ຽວຈີນໃຫ້ດີຂຶ້ນຢ່າງບໍ່ຢຸດຢັ້ງ.
ທ່ານ ອາຣີເຢັຟ ກ່າວບັນຫາດັ່ງກ່າວໃນໂອກາດພົບປະກັບທ່ານ ເຊ້ເຟິ່ງ ເອກອັກຄະລັດຖະທູດຈີນປະຈຳອິນໂດເນເຊຍ ແລະທ່ານກໍໄດ້ກ່າວຕື່ມວ່າ: ຈີນໄດ້ກາຍເປັນປະເທດແຫຼ່ງນັກທ່ອງທ່ຽວຕ່າງປະເທດທີ່ໃຫຍ່ທີ່ສຸດຂອງປະເທດຕົນ, ຂໍສະແດງຄວາມຂອບໃຈຈີນທີ່ໄດ້ສຸມທຸກພະຍາຍາມເພື່ອຊຸກຍູ້ການຮ່ວມມືດ້ານການທ່ອງທ່ຽວລະຫວ່າງສອງປະເທດຕະຫຼອດມາ ແລະຫວັງວ່າ ສອງຝ່າຍຈະເພີ່ມທະວີການຮ່ວມມືອົບຮົມຜູ້ນຳທ່ຽວດ້ວຍພາສາຈີນ, ເປີດເສັ້ນທາງການບິນໂດຍກົງໃຫ້ຫຼາຍກວ່າເກົ່າ ແລະດຶງດູດການລົງທຶນຈາກຈີນ.
ທ່ານເຊ້ເຟິ່ງກ່າວໂດຍຄາດວ່າ, ໃນ 5 ປີຕໍ່ໜ້າ, ນັກທ່ອງທ່ຽວຈີນທີ່ໄປທ່ຽວຕ່າງປະເທດ ຈະບັນລຸ 700 ລ້ານເທື່ອຄົນ ໂດຍສະເລ່ຍ 140 ລ້ານເທື່ອຄົນຕໍ່ປີ, ໃນນັ້ນ ສ່ວນຫຼາຍຈະໄປທ່ຽວປະເທດແລະເຂດແຄວ້ນອ້ອມຂ້າງ, ຂະນະດຽວກັນ, ຈຳນວນນັກທ່ອງທ່ຽວຈີນທີ່ໄປທ່ຽວອິນໂດເນເຊຍນັ້ນ ຍັງຈະເພີ່ມຂຶ້ນອີກ ເຊິ່ງການຮ່ວມມືລະຫວ່າງສອງປະເທດໃນດ້ານນີ້ ຍັງມີຄວາມສາມາດບົ່ມຊ້ອນຢ່າງມະຫາສານ.