ໂດຍຕອບສະໜອງຕາມຄຳເຊີນຂອງທ່ານໂດນັນ ທຣໍາ ປະທານາທິບໍດີອາເມລິກາ, ທ່ານສີຈີ້ນຜິງ ປະທານປະເທດຈີນຈະພົບປະກັບທ່ານທຣໍາຢູ່ລັດໂຟຼຣີດາຂອງອາເມລິກາ. ໃນຖານເປັນການພົບປະລະຫວ່າງປະມຸກລັດຈີນອາເມລິກາເທື່ອທຳອິດພາຍຫຼັງລັດຖະບານໃໝ່ອາເມລິກາຂຶ້ນຮັບຕຳແໜ່ງ, ການພົບປະເທື່ອນີ້ໄດ້ຮັບຄວາມສົນໃຈໃນລະດັບສູງຈາກວົງການຕ່າງໆ. ປະມຸກລັດສອງປະເທດຈະວາງແຜນການທິດທາງຂະຫຍາຍການພົວພັນລະຫວ່າງຈີນອາເມລິກາໃນໄລຍະໃໝ່ແນວໃດ, ຈະເປິກສາຫາລືຫົວຂໍ້ໃດແດ່ຂອງທົວໂລກ, ພາກພື້ນແລະສອງຝ່າຍທີ່ສົນໃຈນຳກັນ? ກ່ຽວກັບບັນຫານີ້, ນັກຂ່າວ CRI ໄດ້ສຳພາດທ່ານເຄວິນ ຣຸດ ອະດີດນາຍົກລັດຖະມົນຕີອົສຕຼາລີ, ປະທານສະຖາບັນຄົ້ນຄວ້ານະໂຍບາຍສະມາຄົມອາຊີຂອງອາເມລິກາໃນປັດຈຸບັນຢູ່ນິວຢອກ.
ທ່ານເຄວິນ ຣຸດກ່າວວ່າ, ຜູ້ນຳສອງປະເທດຈີນອາເມລິກາໄດ້ບັນລຸການພົບປະໃນເວລາທີ່ທ່ານທຣໍາຂຶ້ນຮັບຕຳແໜ່ງບໍ່ຮອດ 100 ມື້, ຈະສ້າງສະຖານະການອັນດີງາມໃຫ້ແກ່ການກຳນົດທິດທາງຂະຫຍາຍການພົວພັນຈີນອາເມລິກາໃນໄລຍະໃໝ່ແລະຊຸກຍູ້ການພົວພັນລະຫວ່າງສອງປະເທດໃຫ້ກ້າວໄປໜ້າບົນຈຸດເລີ່ມຕົ້ນໃໝ່.
ໃນເວລາເວົ້າເຖິງຫົວຂໍ້ທີ່ອາດຈະເປິກສາຂອງການພົບປະລະຫວ່າງປະມຸກລັດຈີນອາເມລິກາເທື່ອນີ້, ທ່ານເຄວິນຣຸດຊີ້ອອກວ່າ, ການພົວພັນເສດຖະກິດການຄ້າຈີນອາເມລິກາຈະແມ່ນຫົວຂໍ້ສຳຄັນທີ່ສອງຝ່າຍຈະເປິກສາຫາລື. ທ່ານເຫັນວ່າ, ສອງຝ່າຍຈີນອາເມລິກາຄວນເປກສາການເປີດກວ້າງການຄ້າລະຫວ່າງສອງຝ່າຍແນວໃດໂດຍຜ່ານການພົບປະເທື່ອນີ້ເພື່ອກ້າວເຖິງການຮ່ວມມືຕ່າງຝ່າຍຕ່າງມີຜົນປະໂຫຍດ.
ທ່ານເຄວິນຣຸດຊີ້ອອກວ່າ, ສະພາບຄວາມໝັ້ນຄົງຂອງເຂດອາຊີປາຊີຟິກກໍ່ຈະແມ່ນຈຸດສຳຄັນຂອງການພົບປະລະຫວ່າງປະມຸກລັດຈີນອາເມລິກາເທື່ອນີ້, ສອງປະເທດຄວນປິກສາຫາລືກັນແລະວາງນະໂຍບາຍການຕ່າງປະເທດອັນໃໝ່ເພື່ອຜ່ອນຄາຍສະຖານະການອັນເຄັ່ງຕຶງຂອງແຫຼມເກົາຫຼີ.