ຄະນະສືບສວນ-ສອບສວນສະຫະພັນຣັດເຊຍຢືນຢັນໃນວັນທີ 4 ເມສານີ້ວ່າ ໄດ້ຮູ້ຖານະຜູ້ຕ້ອງສົງໄສກໍ່ເຫດລະເບີດໃນລົດໄຟໃຕ້ດິນເມືອງແຊງເປເຕີສະເບິກໃນວັນທີ 3 ເມສານີ້ແລ້ວ.
ທັງນີ້, ທ່ານສະເວັດລານາ ປີເຕຣນໂກ ໂຄສົກຄະນະສືບສວນ-ສອບສວນສະຫະພັນຣັດເຊຍ ກ່າວວ່າ: ຜູ້ຕ້ອງສົງໄສກໍ່ເຫດລະເບີດດັ່ງກ່າວຊື່ ອັກບາຊອນ ຈາລີລົຟ, ເກີດເມື່ອປີ 1995. ຂະນະທີ່ກ່ອນຈະເກີດເຫດລະເບີດນັ້ນ, ຜູ້ກ່ຽວຍັງໄດ້ປະຖົງທີ່ບັນຈຸອຸປະກອນປະກອບລະເບີດຢູ່ປ້າຍອູປຣີຊິງ ສະແກວ໋ ຂອງລົດໄຟໃຕ້ດິນເມືອງແຊງເປເຕີສະເບິກອີກ, ແຕ່ບໍ່ໄດ້ເກີດລະເບີດແຕ່ປະການໃດ.
ນອກນີ້, ກະຊວງສາທາລະນະສຸກຣັດເຊຍໄດ້ປະກາດໃນວັນທີ 4 ເມສານີ້ວ່າ: ຜູ້ເສຍຊີວິດໃນເຫດລະເບີດດັ່ງກ່າວ ໄດ້ເພີ່ມຂຶ້ນເປັນ 14 ຄົນ ແລະປັດຈຸບັນຍັງມີເກືອບ 50 ຄົນພວມຮັບການປິ່ນປົວຢູ່ໂຮງໝໍ.
ຕອນບ່າຍວັນທີ 3 ເມສານີ້ ຕູ້ລົດໄຟໃຕ້ດິນແຊງເປເຕີສະເບິກໄດ້ເກີດລະເບີດຂະນະແລ່ນຈາກປ້າຍເຊນນາຢາ ໂປລສ໌ຊັດ ຫາ ປ້າຍ ວິທະຍາໄລເຕັກໂນໂລຢີເຊັສກີ, ຂະນະທີ່ໄອຍະການສູງສຸດຣັດເຊຍຊີ້ນີ້ຄືເຫດການໂຈມຕີແບບກໍ່ການຮ້າຍ.
