ລາວຈັດກິດຈະກຳ "ວັດທະນະທຳຈີນກ້າວເຂົ້າສູ່ອາຊຽນ" ຢ່າງເປັນທາງການ

ຕາມຂ່າວ CRI: ກິດຈະກຳ "ວັດທະນະທຳຈີນກ້າວເຂົ້າສູ່ອາຊຽນ" ໄດ້ຈັດຂຶ້ນຢູ່ນະຄອນຫຼວງວຽງຈັນ ສປປ ລາວຢ່າງເປັນທາງການ ໃນວັນທີ 4 ເມສານີ້.

ໃນກິດຈະກຳຄັ້ງນີ້, ໄດ້ວາງສະແດງປຶ້ມ 400 ກວ່າຫົວ, ການຂຽນຕົວໜັງສືຈີນງາມ ແລະຮູບແຕ້ມ ຮ້ອຍກວ່າແຜ່ນ ທີ່ສ່ອງແສງໃຫ້ເຫັນເຖິງຮີດຄອງປະເພນີ, ວັດທະນະທຳ ແລະບຸກຄົນທີ່ມີຊື່ສຽງຂອງຈີນ, ຂະນະດຽວກັນ, ຍັງໄດ້ປາຖະກະຖາບັນຫາວັດທະນະທຳ "ເພດຍິງແລະຊາວໜຸ່ມຈາກຮູບແຕ້ມສີນ້ຳມັນໃນສະໄໝປັດຈຸບັນຂອງຈີນ", ການສະແດງມໍລະດົກວັດທະນະທຳທີ່ບໍ່ແມ່ນວັດຖຸລະດັບຊາດ, ການສະແດງສິລະປະ ແລະອື່ນໆ.

ກິດຈະກຳ "ວັດທະນະທຳຈີນກ້າວເຂົ້າສູ່ອາຊຽນ" ເປັນກິດຈະກຳແລກປ່ຽນວັດທະນະທຳສາກົນທີ່ເນັ້ນໃສ່ແລກປ່ຽນກັບປະເທດອາຊຽນ ເຊິ່ງເປົ້າໝາຍທີ່ໄດ້ຈາກການວາງສະແດງວັດທະນະທຳຈີນດ້ວຍວິທີເຕັກນິກວິທະຍາສາດ ນີ້ກໍເພື່ອບໍລິການຫົວໜ່ວຍວິສາຫະກິດວັດທະນະທຳຈີນແລະບັນດາປະເທດໃນອາຊຽນຄົບວົງຈອນ, ຊຸກຍູ້ໃຫ້ສອງຝ່າຍແລກປ່ຽນແນວຄິດພັດທະນາວັດທະນະທຳ ແລະເປັນການເພີ່ມທະວີຄວາມເຂົ້າໃຈກັນລະຫວ່າງປະຊາຊົນສອງຝ່າຍ.