ອີງຕາມສື່ມວນຊົນຊີຣີລາຍງານໃນວັນທີ 8 ເມສານີ້ວ່າ, ມື້ດຽວກັນ, ສະຫະພັນສາກົນທີ່ນຳໂດຍອາເມລິກາເພື່ອໂຈມຕີກຸ່ມຫົວຮຸນແຮງ IS ນັ້ນໄດ້ໂຈມຕີບ້ານແຫ່ງໜຶ່ງຂອງແຂວງຣາຄາທີ່ຢູ່ພາກເໜືອຂອງຊີຣີທາງອາກາດ, ເຮັດໃຫ້ປະຊາຊົນຢ່າງໜ້ອຍ 15 ຄົນ ເສຍຊີວິດ.
ຂ່າວສານຊີຣີໄດ້ອ້າງຄວາມເວົ້າຂອງບຸກຄົນຜູ້ສັນທັດກໍລະນີແຫ່ງນັ້ນມາລາຍງານວ່າ, ຜູ້ເສຍຊີວິດລວມທັງເດັກນ້ອຍ 3 ຄົນ, ຂະນະດຽວກັນ, ການໂຈມຕີຍັງໄດ້ເຮັດໃຫ້ຫຼາຍຄົນບາດເຈັບໜັກແລະຈຳນວນຄົນເສຍຊີວິດອາດຈະເພີ່ມຂຶ້ນ.
ຂ່າວລາຍງານວ່າ, ເດືອນມີນາປີນີ້, ສະຫະພັນສາກົນຍັງໄດ້ໂຈມຕີໂຮງຮຽນແຫ່ງໜຶ່ງທີ່ຈັດວາງຜູ່ທີ່ບໍ່ມີບ່ອນເພີ່ງພາອາໄສຂອງແຂວງຣາຄາແລະສຸເຫຼົ່າອິດສະລາມແຫ່ງໜຶ່ງຂອງແຂວງອາເລັບໂປ, ເຮັດໃຫ້ 33 ຄົນ ແລະ 44 ຄົນເສຍຊີວິດ.
ເດືອນກັນຍາປີ 2014 , ຫຼາຍປະເທດຄືອາເມລິກາເປັນຕົ້ນໄດ້ສ້າງຕັ້ງສະຫະພັນສາກົນ, ເພື່ອໂຈມຕີທາງອາກາດຕໍ່ເປົ້າໝາຍ IS ຢູ່ຊີຣີແລະອີຣັກ. ລັດຖະບານຊີຣີເຫັນວ່າ, ການກະທຳນີ້ບໍ່ໄດ້ຮັບການມອບສິດຈາກສະພາຄວາມໝັ້ນຄົງອົງການສະຫະປະຊາຊາດ, ແລະຕິຕຽນວ່າ, ການໂຈມຕີທາງອາກາດທີ່ນຳໂດຍອາເມລິກາໄດ້ເຮັດໃຫ້ປະຊາຊົນຊີຣີເສຍຊີວິດແລະບາດເຈັບຢ່າງຫຼວງຫຼາຍ.