ຕາມຂ່າວສານຊິນຮວາ: ກຳປັ່ນ "ເຊໂວນ" ຂອງສ.ເກົາຫຼີທີ່ຫຼົ້ມໄດ້ຖືກສົ່ງມາຮອດທ່າກຳປັ່ນມັອກໂປແຂວງເຈວລານຳໂດປະເທດດັ່ງກ່າວແລ້ວ ແລະນັບວ່າເປັນຜົນສຳເລັດການກອບກູ້ກຳປັ່ນລຳດັ່ງກ່າວຈາກການປະຕິບັດຂອງພະແນກກູ້ໄພທາງນ້ຳຊຽງໄຮ້.
ທ່ານຈຽງແຢນ ຜູ້ອຳນວຍການໂຄງການກອບກູ້ກຳປັ່ນ "ເຊໂວນ" ເປີດເຜີຍວ່າ, ໂດຍອີງຕາມຄວາມຮຽກຮ້ອງຂອງກະຊວງທະເລແລະຜະລິດຕະພັນນ້ຳ ສ.ເກົາຫຼີ, ພາຍຫຼັງກອບກູ້ກຳປັ່ນ "ເຊໂວນ" ໄດ້ແລ້ວ, ນັກວິຊາການພະແນກກູ້ໄພທາງນ້ຳຊຽງໄຮ້ຍັງຕ້ອງປະສານສົມທົບກັບເຈົ້າໜ້າທີ່ ສ.ເກົາຫຼີ ດຳເນີນການກວດກາພື້ນທະເລຈຸດທີ່ກຳປັ່ນຫຼົ້ມ ເພື່ອຢືນຢັນວ່າຍັງມີສົບຂອງຜູ້ຖືກເຄາະຮ້າຍຫຼືບໍ່ ແລະຄາດວ່າຈະຕ້ອງໃຊ້ເວລາປະມານໜຶ່ງເດືອນ.
ພະແນກກູ້ໄພທາງນ້ຳຊຽງໄຮ້ແລະບໍລິສັດໂຄງການໃຕ້ນ້ຳ ສ.ເກົາຫຼີໄດ້ຣ່ວມກັນປະມູນສາກົນກ່ຽວກັບການກອບກູ້ກຳປັ່ນ "ເຊໂວນ" ແລະໄດ້ລົງນາມໃນສັນຍາກອບກູ້ກັບກະຊວງທະເລແລະຜະລິດຕະພັນນ້ຳ ສ.ເກົາຫຼີ ເມື່ອເດືອນສິງຫາ 2015.