ໂທລະພາບແຫ່ງຊາດເອຢິບລາຍງານໃນວັນທີ 11 ເມສານີ້ວ່າ: ລັດຖະສະພາເອຢິບໄດ້ລົງຄະແນນສຽງຮັບຮອງມະຕິວ່າດ້ວຍການປະກາດພາວະສຸກເສີນເປັນເວລາ 3 ເດືອນໃນຂອບເຂດທົ່ວປະເທດຫຼັງເກີດເຫດລະເບີດໂບດຄຣິສ 2 ແຫ່ງໃນວັນທີ 9 ເມສານີ້ຢູ່ເມືອງຕານຕາແລະເມືອງອາເລັກຊັນດຣາ ທາງພາກເໜືອ ເຊິ່ງເຮັດໃຫ້ມີຜູ້ເສຍຊີວິດຢ່າງໜ້ອຍ 44 ຄົນແລະ100 ກວ່າຄົນບາດເຈັບ. ຂະນະທີ່ກຸ່ມISອ້າງ ຄວາມຮັບຜິດຊອບຕໍ່ເຫດການລະເບີດສອງຄັ້ງດັ່ງກ່າວ.
ທ່ານອັບເດວ ຟາຕາ ອັນ ໄຊຊີ ປະທານາທິບໍດີເອຢິບໄດ້ຖະແຫຼງຜ່ານໂທລະພາບໃນຄືນວັນທີ 9 ເມສານີ້ວ່າ ປະເທດຕົນຈະຢູ່ໃນພາວະສຸກເສີນເປັນເວລາ 3 ເດືອນ. ຈາກນັ້ນ, ຄະນະລັດຖະບານກໍປະກາດວ່າ ເລີ່ມປະຕິບັດຕາມການປະກາດພາວະສຸກເສີນແຕ່ເວລາ13 ໂມງຂອງວັນທີ 10 ເມສານີ້ເປັນຕົ້ນໄປ. ທັງນີ້ ຕາມລັດຖະທຳມະນູນຂອງເອຢິບ, ຂໍ້ຕົກລົງດັ່ງກ່າວຕ້ອງໄດ້ຜ່ານການຮັບຮອງຈາກການລົງຄະແນນສຽງເຫັນດີຂອງລັດຖະສະພາແລ້ວຈິ່ງຈະເກີດຜົນສັກສິດຢ່າງເປັນທາງການໄດ້.
 |
