ສື່ມວນຊົນອິນໂດເນເຊຍລາຍງານໃນວັນທີ 12 ເມສານີ້ວ່າ: ຫົວໜ້າກົມກວດກາຄົນເຂົ້າເມືອງອິນໂດເນເຊຍຢືນຢັນໃນວັນທີ 11 ເມສານີ້ວ່າ: ໄດ້ຮັບໜັງສືຈາກເຈົ້າໜ້າທີ່ສືບສວນຂອງຄະນະກຳມະການປາບປາມການສໍ້ລາດບັງຫຼວງໃນຄືນວັນທີ 10 ເມສານີ້ເພື່ອຫ້າມບໍ່ໃຫ້ທ່ານເຊັດຢາ ໂນວານໂຕ ປະທານລັດຖະສະພາອິນໂດເນເຊຍອອກປະເທດພາຍໃນເວລາ 6 ເດືອນ.
ໂຄສົກຄະນະກຳມະການປາບປາມການສໍ້ລາດບັງຫຼວງອິນໂດເນເຊຍຢືນຢັນວ່າ: ເນື່ອງຈາກສົງໄສທ່ານໂນວານໂຕມີສ່ວນກ່ຽວຂ້ອງກັບຄະດີສໍ້ລາດບັງຫຼວງໃນໂຄງການເຮັດບັດປະຈຳຕົວເອເລັກໂຕຣນິກ,ຄະນະຕົນຈິ່ງຮຽກຮ້ອງໃຫ້ກົມກວດກາຄົນເຂົ້າເມືອງຫ້າມບໍ່ໃຫ້ທ່ານໂນວານໂຕອອກປະເທດພາຍໃນ 6 ເດືອນ.
ລັດຖະສະພາອິນໂດເນເຊຍໄດ້ພິຈາລະນາຮ່າງແຜນງົບປະມານແຫ່ງລັດສົກປີ 2011 ແຕ່ເດືອນກໍລະກົດ-ສິງຫາ 2010 ເປັນຕົ້ນມາ ລວມທັງງົບປະມານຈັດຊື້ໃນໂຄງການເຮັດບັດເອເລັກໂຕນິກ ມູນຄ່າ 5.900 ຕື້ຣູເປຍອິນໂດເນເຊຍ ແລະໃນນີ້ 51%ນຳໃຊ້ໃນໂຄງການດັ່ງກ່າວ, 49%ຈະເປັນສ່ວນແບ່ງຜົນກຳໄລໃຫ້ສະມາຊິກສະພາ, ເຈົ້າໜ້າທີ່ກະຊວງພາຍໃນພ້ອມດ້ວຍຜູ້ປະຕິບັດໂຄງການຫຼືບໍລິສັດຄູ່ຮ່ວມມືລວມທັງໝົດຫຼາຍສິບຄົນ ເຊິ່ງລວມທັງອະດີດລັດຖະມົນຕີກະຊວງແລະລັດຖະມົນຕີກະຊວງຄົນປັດຈຸບັນພ້ອມດ້ວຍເຈົ້າໜ້າທີ່ລັດຖະບານຫຼາຍຄົນ.