ວັນທີ 12 ເມສານີ້ ຢູ່ນະຄອນຫຼວງປັກກິ່ງ, ທ່ານ ລີວຢຸນຊ່ານ ກຳມະການປະຈຳກົມການເມືອງສູນກາງພັກ, ເລຂາທິການສູນກາງພັກກອມມູນິດຈີນໄດ້ຕ້ອນຮັບຄະນະຜູ້ແທນໜັງສືພິມເຍິນເຢິນຫວຽດນາມທີ່ນຳໂດຍທ່ານຖວນຮິວ ກຳມະການສູນກາງພັກ, ຫົວໜ້າກອງເສນາທິການໜັງສືພິມເຍິນເຢິນ ປະທານສະມາຄົມນັກຂ່າວຫວຽດນາມ.
ທ່ານ ລີວຢຸນຊ່ານ ກ່າວວ່າ: ໜັງສືພິມປະຊາຊົນລາຍວັນແລະໜັງສືພິມເຍິນເຢິນໃນຖານະເປັນກະບອກສຽງຂອງສູນກາງພັກຈີນແລະຫວຽດນາມ ໄດ້ຮັກສາການພົວພັນກັນດ້ວຍໄມຕີຈິດມິດຕະພາບມາໂດຍຕະຫຼອດ ແລະກາຍເປັນສ່ວນສຳຄັນໃນການໄປມາຫາສູ່ລະຫວ່າງພັກ-ລັດສອງປະເທດ. ຈາກນີ້ຈຶ່ງຫວັງວ່າໜັງສືພິມຂອງສອງພັກຈະເພີ່ມທະວີການແລກປ່ຽນ,ລົງເລິກການຮ່ວມມື ເພື່ອສືບຕໍ່ປະກອບສ່ວນເຂົ້າໃນການເພີ່ມທະວີຄວາມເຂົ້າໃຈແລະຄວາມໄວ້ເນື້ອເຊື່ອໃຈລະຫວ່າງປະຊາຊົນສອງປະເທດ, ປົກປັກຮັກສາບັນຍາກາດສາຍພົວພັນທີ່ມີໄມຕີຈິດມິດຕະພາບລະຫວ່າງສອງພັກ-ລັດຈີນແລະຫວຽດນາມ.
ທ່ານ ຖວນຮິວ ກ່າວວ່າ: ໜັງສືພິມເຍິນເຢິນຫວຽດນາມຍິນດີຖອດຖອນບົດຮຽນນຳໜັງສືພິມປະຊາຊົນລາຍວັນຂອງຈີນເພື່ອຊຸກຍູ້ການພັດທະນາແລະການເຊື່ອມໂຍງເຂົ້າກັນຂອງສື່ມວນຊົນ, ເພີ່ມທະວີການແລກປ່ຽນແລະການຮ່ວມມືກັບໜັງສືພິມປະຊາຊົນລາຍວັນຂອງຈີນ, ຮ່ວມກັນຊຸກຍູ້ສາຍພົວພັນທີ່ມີໄມຕີຈິດມິດຕະພາບລະຫວ່າງສອງພັກ-ລັດແລະປະຊາຊົນສອງປະເທດໃຫ້ສືບຕໍ່ຂະຫຍາຍຕົວກ້າວໜ້າ.
 |
