ຕາມຂ່າວສານຈີນ: ກົມໃຫຍ່ດ່ານພາສີຈີນເຜີຍແຜ່ຂໍ້ມູນຫຼ້າສຸດໃນວັນທີ 13 ເມສານີ້ ໂດຍສະແດງໃຫ້ເຫັນວ່າ, ໃນໄຕມາດທີໜຶ່ງ, ຍອດມູນຄ່າການນຳເຂົ້າແລະສົ່ງອອກສິນຄ້າຂອງປະເທດຕົນ ບັນລຸເຖິງ 6200 ຕື້ຢວນ ເພີ່ມຂຶ້ນ 21,8% ເມື່ອທຽບໃສ່ໄລຍະດຽວກັນຂອງປີຜ່ານມາ; ໃນນັ້ນ ມູນຄ່າສົ່ງອອກບັນລຸ 3300 ຕື້ຢວນ ເພີ່ມຂຶ້ນ 14,8% ແລະມູນຄ່າການນຳເຂົ້າ 2870 ຕື້ຢວນ ເພີ່ມຂຶ້ນ 31,1%. ທັງນີ້ໄດ້ສົ່ງຜົນເຮັດໃຫ້ມູນຄ່າການນຳເຂົ້າແລະສົ່ງອອກຂອງຈີນເພີ່ມຂຶ້ນຕິດຕໍ່ກັນເປັນໄຕມາດທີສາມ.
ທ່ານ ຮວງຊົ້ງພິງ ໂຄສົກກົມໃຫຍ່ດ່ານພາສີຈີນ ກ່າວໃນພິທີຖະແຫຼງຂ່າວທີ່ຈັດຂຶ້ນຢູ່ນະຄອນຫຼວງປັກກິ່ງໃນມື້ດຽວກັນວ່າ, ການທີ່ການນຳເຂົ້າແລະສົ່ງອອກຂອງຈີນເພີ່ມຂຶ້ນໃນໄຕມາດທີໜຶ່ງ ເນື່ອງຈາກ ໜຶ່ງ, ເສດຖະກິດທົ່ວໂລກໄດ້ປັບດີຂຶ້ນຢ່າງຕໍ່ເນື່ອງ, ຄວາມຕ້ອງການພາຍນອກກໍເພີ່ມຂຶ້ນ ເຊິ່ງມີຜົນດີຕໍ່ການເຕີບໂຕຂອງການສົ່ງອອກ; ສອງ, ເສດຖະກິດປະເທດຕົນມີຄວາມໜັກແໜ້ນແລະດີຂຶ້ນ ເຊິ່ງເປັນສ່ວນຊຸກຍູ້ການນຳເຂົ້າເພີ່ມຂຶ້ນຢ່າງຕໍ່ເນື່ອງ ແລະສຸດທ້າຍ, ລາຄາສິນຄ້ານຳເຂົ້າຖີບສູງຂຶ້ນຫຼາຍ ເຮັດໃຫ້ມູນຄ່າການນຳເຂົ້າເພີ່ມຂຶ້ນຢ່າງຫຼວງຫຼາຍ.
 |
