ກອງປະຊຸມຫົວໜ້າຜູ້ຕາງໜ້າການເຈລະຈາເຂດການຄ້າເສລີຈີນ ຍີ່ປຸ່ນແລະສ ເກົາຫຼີເທື່ອທີ 12 ໄດ້ຈັດຂຶ້ນຢູ່ໂຕກຽວ ປະເທດຍີ່ປຸ່ນໃນວັນທີ 13 ເມສານີ້, ໂດຍສາມປະເທດໄດ້ແລກປ່ຽນຄວາມເຫັນຢ່າງເລິກເຊິ່ງວ່າຈະເຮັດແນວໃດເພື່ອຊຸກຍູ້ການຄ້າສິນຄ້າ, ການຄ້າການບໍລິການ, ການລົງທຶນແລະອື່ນໆໃຫ້ດີຂຶ້ນ.
ການເຈລະຈາເທື່ອນີ້ເລີ່ມຈັດຂຶ້ນໃນວັນທີ 10 ເມສານີ້, ໂດຍສາມປະເທດໄດ້ຈັດກອງປະຊຸມໜ່ວຍງານກ່ຽວກັບການຄ້າການບໍລິການ, ໂທລະຄົມ, ການບໍລິການດ້ານທະນາຄານ, ການລົງທຶນ, ນະໂຍບາຍການແຂ່ງຂັນ, ສິດຊັບສິນທາງປັນຍາ, ການຄ້າເອເລັກໂຕຣນິກແລະອື່ນໆ, ແລະໄດ້ແລກປ່ຽນມາດຕະການຄວບຄຸມການຄ້າການບໍລິການຢ່າງຮອບດ້ານແລະລະອຽດເຖິງຖອງ.
ຈີນ ຍີ່ປຸ່ນແລະສ ເກົາຫຼີໄດ້ເລີ່ມເຈລະຈາກ່ຽວກັບເຂດການຄ້າເສລີເມື່ອເດືອນພະຈິກປີ 2012, ເພື່ອເລັ່ງລົງນາມໃນສັນຍາການຄ້າເສລີຢ່າງຮອບດ້ານ, ມີປະສິດທິພາບສູງແລະຕ່າງຝ່າຍຕ່າງມີຜົນປະໂຫຍດ.
 |
