ເປັນຫຍັງຈຶ່ງຕ້ອງສ້າງ "ໜຶ່ງແລວທາງໜຶ່ງເສັ້ນທາງ"

ການທີ່ຮ່ວມກັນສ້າງ "ໜຶ່ງແລວທາງໜຶ່ງເສັ້ນທາງ" ນັ້ນ ເປັນການສອດຄ່ອງກັບກະແສທີ່ໂລກຫັນເປັນຫຼາຍຂົ້ວ, ເສດຖະກິດຫັນເປັນທົ່ວໂລກ, ວັດທະນະທຳຫັນເປັນຫຼາຍປະເພດ ແລະສັງຄົມຫັນເປັນຂໍ້ມູນຂ່າວສານ ເຊິ່ງຕົ້ນຕໍກໍເພື່ອຊຸກຍູ້ໃຫ້ປັດໄຈເສດຖະກິດຄ່ອງໂຕຢ່າງມີລະບຽບແລະເສລີ, ຊັບພະຍາກອນຖືກຈັດສັນຢ່າງມີປະສິດທິພາບສູງ, ຕະຫຼາດເຊື່ອມໂຍງເຂົ້າກັນຢ່າງເລິກເຊິ່ງ, ຊຸກຍູ້ບັນດາປະເທດລຽບຕາມແລວທາງແລະເສັ້ນທາງດັ່ງກ່າວນັ້ນ ປະສົມປະສານນະໂຍບາຍເສດຖະກິດ ແລະດຳເນີນການຮ່ວມມືໃນຂອບເຂດກວ້າງກວ່າເກົ່າ, ລະດັບສູງກວ່າເກົ່າ ແລະເລິກເຊິ່ງກວ່າເກົ່າ. ຂະນະດຽວກັນ, ໂຄງການເຊື່ອມຈອດກັນຂອງ "ໜຶ່ງແລວທາງໜຶ່ງເສັ້ນທາງ" ຈະຊຸກຍູ້ການເຊື່ອມຈອດຍຸດທະສາດການພັດທະນາຂອງບັນດາປະເທດ, ພັດທະນາກຳລັງບົ່ມຊ້ອນຂອງຕະຫຼາດໃນພາກພື້ນ, ຊຸກຍູ້ການລົງທຶນແລະການບໍລິໂພກ, ສ້າງຄວາມຕ້ອງການແລະວຽກເຮັດງານທຳ, ເພີ່ມທະວີການແລກປ່ຽນວັດທະນະທຳແລະອາລະຍະທຳລະຫວ່າງປະຊາຊົນບັນດາປະເທດ ເພື່ອເຮັດໃຫ້ປະຊາຊົນບັນດາປະເທດໄວ້ເນື້ອເຊື່ອໃຈກັນ, ເຄົາລົບເຊິ່ງກັນແລະກັນ ແລະຮ່ວມກັນດຳລົງຊີວິດຢ່າງກົມກຽວກັນ, ສະຫງົບ ແລະຮັ່ງມີ.