ຕວກກີຈັບຕົວຜູ້ຖືກສົງໄສເປັນສະມາຊິກ IS 49 ຄົນທີ່ເຈດຕະນາຢາກກໍ່ເຫດການກໍ່ການຮ້າຍ

ວັນທີ 15 ເມສານີ້,ເຈົ້າໜ້າທີ່ຕຳຫຼວດຕວກກີເປີດເຜີຍວ່າ:ໄດ້ຈັບຕົວຜູ້ຖືກສົງໄສເປັນສະມາຊິກ IS ເຊິ່ງເປັນອົງການຫົວຈັດທັງໝົດ 49 ຄົນຢູ່ອິສຕັນບຸນ ເມືອງໃຫຍ່ທີ່ສຸດຂອງຕວກກີ,ຍ້ອນເຫັນວ່າຄົນເຫຼົ່ານີ້ເຈດຕະນາຢາກກໍ່ເຫດການກໍ່ການຮ້າຍໃນເວລາຈັດການລົງປະຊາມະຕິກ່ຽວກັບການດັດແກ້ລັດຖະທຳມະນູນໃນວັນທີ 16 ເມສານີ້.

ຕາມໜັງສືພິມ"ເຮີຣິເຢັດ"ຕວກກີແຈ້ງຂ່າວວ່າ:ໃນອາທິດທີ່ຜ່ານມາ,ໜ່ວຍງານຕ້ານການກໍ່ການຮ້າຍອົງການຕຳຫຼວດຕວກກີໄດ້ດຳເນີນການເຄື່ອນໄຫວຢູ່ຫຼາຍເຂດຂອງອິສຕັນບຸນໂດຍອີງຕາມການສືບສວນ ແລະໄດ້ຈັບຜູ້ຕ້ອງຫາ 49 ຄົນ,ໃນນັ້ນ,ມີ 41 ຄົນເປັນຄົນຕ່າງປະເທດ.

ຕວກກີໄດ້ມີແຜນຈັດການລົງປະຊາມະຕິກ່ຽວກັບການດັດແກ້ລັດຖະທຳມະນູນໃນວັນທີ 16 ເມສານີ້. ຫວ່າງກ່ອນນີ້ບໍ່ດົນ, ທ່ານຊຸເລມັນ ໂຊຍລູ ລັດຖະມົນຕີກະຊວງພາຍໃນຕວກກີເຜີຍໃຫ້ຮູ້ວ່າ: ຈະຈັດສັນທະຫານປ້ອງກັນຄວາມສະຫງົບປະມານ 2 ແສນ 5 ໝື່ນຄົນແລະສາລະວັດປະມານ 1 ແສນ 2 ໝື່ນຄົນເພື່ອຮັບປະກັນຄວາມສະຫງົບໃນເວລາປ່ອນບັດ.