ວັນທີ 15 ເມສານີ້, ຂະບວນລົດທີ່ບັນທຸກຊາວນິກາຍຊີອະປະເທດຊີຣີໄດ້ຖືກໂຈມຕີດ້ວຍລະເບີດລົດຍົນແບບສະຫຼະຊີບຂະນະທີ່ຖອນຕົວໄປເຖິງເຂດຣາຊີດິນ ທາງພາກຕາເວັນຕົກ ອາເລັບໂປ ປະເທດຊີຣີ. ຂະນະທີ່ເຈົ້າໜ້າທີ່ຊີຣີໄດ້ຢືນຢັນໃນວັນທີ 16 ເດືອນນີ້ວ່າ: ໃນເຫດການດັ່ງກ່າວ, ຜູ້ເສຍຊີວິດໄດ້ເພີ່ມຂຶ້ນເປັນ 112 ຄົນ ແລະອີກ 100 ກວ່າຄົນໄດ້ຮັບບາດເຈັບ.
ທ່ານອັນໂຕນີໂອ ກູເຕີເຣັສ ເລຂາທິການໃຫຍ່ອົງການສະຫະປະຊາຊາດ ໄດ້ຜ່ານໂຄສົກຂອງຕົນອອກຖະແຫຼງການໃນວັນທີ 15 ເມສານີ້ ໂດຍໄດ້ປະນາມເຫດການໂຈມຕີປະຊາຊົນທີ່ກຳລັງຖອນຕົວ ທັງຮຽກຮ້ອງໃຫ້ລົງໂທດຜູ້ກໍ່ເຫດຕາມກົດໝາຍ.
ໃນສັນຍາລະຫວ່າງລັດຖະບານຊີຣີ ແລະ ກຸ່ມປະກອບອາວຸດຕ້ານລັດຖະບານທີ່ສອງຝ່າຍໄດ້ເຊັນກັນກ່ອນໜ້ານີ້ໄດ້ລະບຸວ່າ: ຜູ້ປະກອບອາວຸດຕ້ານລັດຖະບານ 2.300 ກວ່າຄົນພ້ອມຄອບຄົວ ຈະຖອນອອກຈາກນະຄອນຫຼວງດາມັສ ແລະມຸ່ງໜ້າສູ່ແຂວງອິດລິບທີ່ຖືກກຸ່ມປະກອບອາວຸດຕ້ານລັດຖະບານຄວບຄຸມ. ຂະນະດຽວກັນ ປະມານ 5.000 ຄົນຈະຖອນອອກຈາກເມືອງນ້ອຍນິກາຍຊີອະກາຟຣາຢາ ແລະ ໂຟອາ ແຂວງອິດລິບ ທີ່ຖືກກຸ່ມປະກອບອາວຸດຕ້ານລັດຖະບານປິດລ້ອມ ແລະ ມຸ່ງໜ້າສູ່ອາເລັບໂປ, ແຕ່ກຸ່ມປະກອບອາວຸດຕ້ານລັດຖະບານເຄີຍໄດ້ສະກັດກັ້ນຂະບວນລົດທີ່ບັນທຸກຊາວນິກາຍຊີອະເຂົ້າສູ່ອາເລັບໂປຈາກເຂດຣາຊີດິນ.
