ງານວາງສະແດງສາກົນຫວຽດນາມຄັ້ງທີ 27 ຈະຈັດຂຶ້ນຢູ່ນະຄອນຫຼວງຮາໂນ້ຍ ແຕ່ວັນ ທີ 19-22 ເມສານີ້ ໂດຍຈະດຶງດູດ 500 ກວ່າບໍລິສັດ ຈາກ 23 ປະເທດແລະເຂດແຄວ້ນເຂົ້າຮ່ວມ ລວມທັງວິສາຫະກິດຈາກອາຊີ, ອາຟຣິກາ, ອາເມລິກາໃຕ້ ແລະ ເອີຣົບ. ໃນງານວາງສະແດງຄັ້ງນີ້ໄດ້ຈັດໃຫ້ມີຮ້ານວາງສະແດງອຸປະກອນກົນຈັກໃຊ້ໃນອຸດສາຫະກຳ, ວັດສະດຸກໍ່ສ້າງ, ຜະລິດຕະພັນເອເລັກໂຕຣນິກ, ຜະລິດຕະພັນເຕັກໂນໂລຊີຂໍ້ມູນຂ່າວສານ, ຜະລິດຕະພັນສາທາລະນະສຸກ ແລະອື່ນໆ ລວມທັງໝົດ 600 ກວ່າຮ້ານ.
ທ່ານບຸຍຮິວເຊິນ ຫົວໜ້າກົມສົ່ງເສີມການຄ້າສາກົນຫວຽດນາມ ກ່າວວ່າ: ງານວາງສະແດງຄັ້ງນີ້ຈັດຂຶ້ນໃນໂອກາດປະເທດຕົນເປັນເຈົ້າພາບກອງປະຊຸມອາເປັກປີ 2017 ຂະນະທີ່ງານວາງສະແດງສາກົນຈັດຂຶ້ນປີລະເທື່ອ ແມ່ນງານວາງສະແດງປະຈຳປີທີ່ສຳຄັນສຳລັບວົງການອຸດສາຫະກຳ ແລະ ນັກທຸລະກິດການຄ້າ ປະເທດຕົນ ເພາະຈະເປັນການສ້າງໂອກາດການຕະຫຼາດໃຫ້ແກ່ວິສາຫະກິດປະເທດຕົນໃນການເປີດກວ້າງການສົ່ງອອກ ແລະ ຂະຫຍາຍການຕະຫຼາດພາຍໃນປະເທດ. ສຳລັບງານວາງສະແດງປີນີ້ຈະເນັ້ນ "ເພີ່ມທະວີການເຊື່ອມຕໍ່ເສດຖະກິດພາກພື້ນແລະສາກົນ".