ຂະແໜງການທ່ອງທ່ຽວລາຊະອານາຈັກກຳປູເຈຍເປີດເຜີຍໃນວັນທີ 17 ເມສານີ້ວ່າ: ບຸນປີໃໝ່ຫຼືບຸນຫົດນ້ຳຕະຫຼອດ 4 ວັນຂອງປະເທດຕົນ ສະເພາະແຕ່ກິດຈະກຳສະຫຼອງຢູ່ອັງກໍວັດສາມາດສ້າງລາຍຮັບຈາກນັກທ່ອງທ່ຽວທັງພາຍໃນແລະຕ່າງປະເທດເກືອບ 100 ລ້ານໂດລາສະຫະລັດ.
ທ່ານຕົງຄຸນ ລັດຖະມົນຕີກະຊວງທ່ອງທ່ຽວກຳປູເຈຍຢືນຢັນວ່າ ໄລຍະບຸນປີໃໝ່ແຕ່ວັນທີ 13-16ເມສານີ້, ແຂວງຊຽມລຽບ ເຊິ່ງມີອັງກໍວັດ ເປັນແຫຼ່ງທ່ອງທ່ຽວທີ່ຊື່ດັງນັ້ນໄດ້ຕ້ອນຮັບນັກທ່ອງທ່ຽວທັງພາຍໃນແລະຕ່າງປະເທດກວ່າ 1 ລ້ານ 6 ແສນຄົນ ເພີ່ມຂຶ້ນ 22,73%ເມື່ອທຽບໃສ່ໄລຍະດຽວກັນຂອງປີຜ່ານມາ, ໃນນີ້ ນັກທ່ອງທ່ຽວພາຍໃນ 1 ລ້ານ 6 ແສນຄົນ, ນັກທ່ອງທ່ຽວສາກົນ 31.800 ກວ່າຄົນ ເພີ່ມຂຶ້ນ 7,8%, ສ່ວນລາຍຮັບຈາກການຂາຍປີ້ກໍບັນລຸ 1 ລ້ານ 2 ແສນ 2 ໝື່ນໂດລາ ເພີ່ມຂຶ້ນ 104,64%.
ທ່ານຕົງຄຸນກ່າວຕື່ມວ່າ ສະເລ່ຍແລ້ວນັກທ່ອງທ່ຽວພາຍໃນໃຊ້ຈ່າຍຄົນລະ 50 ໂດລາ, ນັກທ່ອງທ່ຽວສາກົນ 500 ໂດລາສົ່ງຜົນເຮັດໃຫ້ຍອດມູນຄ່າການບໍລິໂພກຂອງນັກທ່ອງທ່ຽວທັງພາຍໃນແລະຕ່າງປະເທດໃນໄລຍະບຸນປີໃໝ່ອາດຈະສູງເຖິງ 95 ລ້ານໂດລາສະຫະລັດ.