ສ້າງຕັ້ງສະຖາບັນຄົ້ນຄວ້າເສັ້ນທາງສາຍໄໝຢູ່ປັກກິ່ງ

ສະຖາບັນວິທະຍາສາດສັງຄົມແຫ່ງຊາດຈີນແລະສະມາຄົມສົ່ງເສີມການເງິນພັດທະນາຈີນໄດ້ຮ່ວມກັນສ້າງຕັ້ງສະຖາບັນຄົ້ນຄວ້າເສັ້ນທາງສາຍໄໝຂຶ້ນຢູ່ນະຄອນຫຼວງປັກກິ່ງໃນວັນທີ 17 ເມສານີ້ ແລະໃນໂອກາດດັ່ງກ່າວກໍໄດ້ແຕ່ງຕັ້ງທ່ານເສິນຢວນ ຮອງປະທານສະພາປຶກສາການເມືອງປະຊາຊົນແຫ່ງຊາດຈີນ,ປະທານສະມາຄົມສົ່ງເສີມການເງິນພັດທະນາຈີນແລະທ່ານຫວາງເວີຍກວ່າງ ປະທານສະຖາບັນວິທະຍາສາດສັງຄົມແຫ່ງຊາດຈີນເປັນປະທານກິຕິມະສັກຮ່ວມຂອງສະຖາບັນດັ່ງກ່າວ, ທ່ານຊາຍຟາງຮອງປະທານສະຖາບັນວິທະຍາສາດສັງຄົມຈີນເປັນປະທານຄະນະມົນຕີ ແລະທ່ານຫຼີຈີຜິງ ຮອງປະທານບໍລິຫານງານສະມາຄົມສົ່ງເສີມການເງິນພັດທະນາຈີນເປັນປະທານ.

ໃນພິທີສ້າງຕັ້ງສະຖາບັນຄົ້ນຄວ້າເສັ້ນທາງສາຍໄໝໃນວັນທີ 17 ເມສານີ້ຍັງໄດ້ເປີດຊຸດຝຶກອົບຮົມສາກົນການສ້າງໜຶ່ງແລວທາງໜຶ່ງເສັ້ນທາງກັບການພັດທະນາເຂດເອີຣົບ-ອາຊີພ້ອມກັນ ເຊິ່ງການຝຶກອົບຮົມຊຸດທຳອິດນີ້ມີສຳມະນາກອນ 25 ຄົນຈາກຂະແໜງການການຕ່າງປະເທດ,ວິຊາການແລະວິສາຫະກິດຂອງ 7 ປະເທດເອີຣົບ-ອາຊີເປັນຕົ້ນ ຣັດເຊຍ,ເບລາຣູຊີ,ອຸສເບກິສະຖານແລະອື່ນໆເຂົ້າຮ່ວມ.