ຫວ່າງມໍ່ໆມານີ້, ທ່ານ ຫວູຫງອກກວິງ ປະທານສະຫະພັນຜະລິດຕະພັນນົມຂອງຫວຽດນາມກ່າວວ່າ: ປັດຈຸບັນ, ໄດ້ມີວິສາຫະກິດຜະລິດຕະພັນນົມທີ່ມີຊື່ສຽງຂອງຫວຽດນາມຫຼາຍແຫ່ງໄດ້ຫຼືກຽມເຈາະຕະຫຼາດຈີນ. ແນວໃດກໍດີ ຫວັງວ່າສອງປະເທດຈະບັນລຸການເຊັນສັນຍາການສົ່ງອອກແລະນຳເຂົ້າຜະລິດຕະພັນກະສິກຳໂດຍໄວ.
ທ່ານ ຫວູຫງອກກວິງ ກ່າວຕື່ມວ່າ: ຜູ້ບໍລິໂພກຊາວຈີນແລະຫວຽດນາມໄດ້ມີຄວາມຊິນເຄີຍທີ່ຄ້າຍຄືກັນໃນການຊື້ຜະລິດຕະພັນນົມ ແລະຈາກນີ້ຈະເຮັດໃຫ້ຜະລິດຕະພັນຂອງຫວຽດນາມມີທ່າແຮງຫຼາຍກວ່າປະເທດອື່ນ. ນອກນີ້, ຜະລິດຕະພັນຂອງຫວຽດນາມມີລາຄາຕ່ຳກວ່າຜະລິດຕະພັນຂອງປະເທດອື່ນ ທັງຮັບປະກັນຕາມມາດຖານຄຸນນະພາບສາກົນ ແລະມີທ່າແຮງດຶງດູດຜູ້ບໍລິໂພກໄດ້ເປັນຢ່າງດີ.
ບໍລິສັດຜະລິດຕະພັນນົມຂອງຮ່າໂນ້ຍໄດ້ເຂົ້າຮ່ວມງານວາງສະແດງສິນຄ້າຈີນ-ອາຊຽນຢູ່ເມືອງນານນິງເຂດປົກຄອງຕົນເອງເຜົ່າຈວ້າງກວາງຊີຈີນສອງປີຕິດຕໍ່ກັນ. ທ່ານ ຮ່າກວ່າງຕວນ ຜູ້ອຳນວຍການໃຫຍ່ບໍລິສັດດັ່ງກ່າວກ່າວວ່າ: "ງານວາງສະແດງຄືໂອກາດດີທີ່ສຸດເພື່ອໂຄສະນາເຜີຍແຜ່ຜະລິດຕະພັນຕໍ່ຜູ້ບໍລິໂພກຊາວຈີນແລະເມື່ອເຫັນຜູ້ບໍລິໂພກຊາວຈີນລຽນແຖວຊື້ນົມສົ້ມຂອງພວກເຮົາ,ພວກເຮົາກໍຮູ້ສຶກຕື່ນເຕັ້ນແລະດີໃຈຫຼາຍ."
 |
