ຕາມຂ່າວ CRI: ວັນທີ 18 ເມສານີ້, ທ່ານຣີເຄັບ ເຕຢິບ ເອີໂດກັນ ປະທານາທິບໍດີຕວກກີໄດ້ໃຫ້ກຽດຕ້ອນຮັບການເຂົ້າຢ້ຽມຄຳນັບຂອງທ່ານນາງຫຼິວຢຽນຕຸ່ງ, ຮອງນາຍົກລັດຖະມົນຕີຈີນໃນໂອກາດເດີນທາງຢ້ຽມຢາມປະເທດດັ່ງກ່າວຢູ່ທຳນຽບປະທານາທິບໍດີໃນອັງກາຣາ.
ທ່ານເອີໂດກັນກ່າວວ່າ, ຫຼາຍປີຜ່ານມາ, ຂ້າພະເຈົ້າໄດ້ພົບປະກັບປະທານສີຈິ້ນຜີງມາແລ້ວຫຼາຍເທື່ອ, ໄດ້ຊຸກຍູ້ສາຍພົວພັນມິດຕະພາບລະຫວ່າງສອງປະເທດໃຫ້ຂະຫຍາຍຕົວຢ່າງແຂງແຮງ. ຂ້າພະເຈົ້າຖືສຳຄັນແລະກໍພ້ອມເຂົ້າຮ່ວມເວທີປຶກສາຫາລືສຸດຍອດການຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ" ແລະພົບກັບປະທານສີຈິ້ນຜີງອີກເທື່ອໜຶ່ງໃນເດືອນພຶດສະພາ. ຕວກກີແລະຈີນລ້ວນແຕ່ແມ່ນປະເທດທີ່ສຳຄັນໃນອາຊີ, ແລະຈາກນີ້ຈຶ່ງຫວັງວ່າສອງປະເທດຈະຂຸດຄົ້ນກຳລັງບົ່ມຊ້ອນຢ່າງເຕັມປ່ຽມ, ແລະລົງເລິກການຮ່ວມມືເສດຖະກິດການຄ້າສອງຝ່າຍ, ທັງຍິນດີຕ້ອນຮັບວິສາຫະກິດຈີນເຂົ້າໄປລົງທຶນຢູ່ຕວກກີ, ແລະຍິນດີເພີ່ມທະວີການຮ່ວມມືກັບຈີນໃນການຕ້ານການກໍ່ການຮ້າຍ.
ຂະນະທີ່ທ່ານນາງຫຼິວຢຽນຕຸ່ງກໍໄດ້ສະແດງຄວາມຊົມເຊີຍທີ່ຕວກກີປະສົບຜົນສຳເລັດໃນການລົງປະຊາມະຕິກ່ຽວກັບການປັບປຸງລັດຖະທຳມະນູນທັງຍິນດີຕ້ອນຮັບທ່ານເອໂດກັນໃນການເດີນທາງເຂົ້າຮ່ວມເວທີປຶກສາຫາລືສຸດຍອດການຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ"ຢູ່ຈີນ, ແລະເຊື່ອວ່າການຢ້ຽມຢາມເທື່ອນີ້ຈະເພີ່ມກຳລັງແຂງແຮງໃໝ່ໃຫ້ແກ່ການຂະຫຍາຍສາຍພົວພັນລະຫວ່າງຈີນກັບຕວກກີ.
 |
