ພະແນກຕິດຕາມກວດກາຄຸນະພາບແລະກັກກັນຕາມການເຂົ້າອອກເມືອງເຂດກວາງຊີ ສປ ຈີນ ໄດ້ເປີດເຜີຍໃນວັນທີ 19 ເມສານີ້ວ່າ: ໃນໄຕມາດທຳອິດຂອງປີນີ້, ການນຳເຂົ້າຖ່ານຫີນຜ່ານດ່ານຊາຍແດນກວາງຊີບັນລຸກວ່າ 6 ລ້ານ 3 ແສນໂຕນ ເພີ່ມຂຶ້ນ 23,2% ເມື່ອທຽບໃສ່ໄລຍະດຽວກັນຂອງປີຜ່ານມາ, ຂະນະທີ່ການນຳເຂົ້າຖ່ານຫີນຈາກຫວຽດນາມ, ອິນໂດເນເຊຍ ແລະ ປະເທດອື່ນໆໃນອາຊຽນ ໄດ້ກວມອັດຕາສູງສົມຄວນ.
ນັກວິເຄາະຊີ້ໃຫ້ເຫັນວ່າ: ການທີ່ກວາງຊີນຳເຂົ້າຖ່ານຫີນເພີ່ມຂຶ້ນຢ່າງຫຼວງຫຼາຍນັ້ນ ເນື່ອງຈາກມີທ່າແຮງສອງດ້ານ ຄື ໜຶ່ງ, ທ່າແຮງດ້ານລາຄາ ສາມາດຂົນສົ່ງຖ່ານຫີນທາງທະເລເຂົ້າເມືອງໂດຍຜ່ານທ່າຝາງເສີງ ແລະ ທ່າຊິ່ນໂຈ່ວ ເຮັດໃຫ້ຕົ້ນທຶນຕ່ຳລົງເມື່ອທຽບໃສ່ຖ່ານຫີນທີ່ຜະລິດພາຍໃນປະເທດແລະຂົນສົ່ງດ້ວຍທາງລົດໄຟ ແລະ ສອງ, ທ່າແຮງດ້ານພູມສາດ ກວາງຊີມີເງື່ອນໄຂເອື້ອອຳນວຍດ້ານນະໂຍບາຍ, ທ່າກຳປັ່ນ ແລະ ພູມສາດ ເຊິ່ງເປັນການສ້າງຄວາມສະດວກໃຫ້ແກ່ການນຳເຂົ້າຖ່ານຫີນ. ນອກນີ້, ຫວຽດນາມ, ອິນໂດເນເຊຍ ແລະ ປະເທດອື່ນໆໃນອາຊຽນກໍມີຊັບພະຍາກອນຖ່ານຫີນທີ່ອຸດົມສົມບູນ ໂດຍສະເພາະຖ່ານຫີນອັງຕລາຊິດມີອັດຕາຄວາມຮ້ອນສູງ ທັງລາຄາຖືກ ຈຶ່ງໄດ້ຮັບຄວາມນິຍົມຊົມຊອບຈາກວິສາຫະກິດທີ່ຕ້ອງການຖ່ານຫີນບໍ່ຫຼາຍພາຍໃນປະເທດ.