ທ່ານວາງຢີ້ ລັດຖະມົນຕີກະຊວງການຕ່າງປະເທດຈີນໄດ້ພົບປະກັບທ່ານຕັງທຸນ ທີ່ປຶກສາຄວາມໝັ້ນຄົງແຫ່ງຊາດມຽນມາໃນໂອກາດຢ້ຽມຢາມຈີນ ຢູ່ນະຄອນຫຼວງປັກກິ່ງໃນວັນທີ 19 ເມສານີ້.
ທ່ານວາງຢີ້ກ່າວວ່າ, ຈີນປະຕິບັດນະໂຍບາຍມິດຕະພາບຕໍ່ມຽນມາມາໂດຍຕະຫຼອດ ໂດຍເຫັນໄດ້ຈາກຜົນສຳເລັດການຢ້ຽມຢາມຈີນຂອງທ່ານປະທານາທິບໍດີທິນຈໍ ແລະທ່ານນາງອອງຊານຊູຈີ ທີ່ປຶກສາແຫ່ງລັດມຽນມາຈະເດີນທາງມາເຂົ້າຮ່ວມກອງປະຊຸມສຸດຍອດເວທີປຶກສາຫາລືການຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ" ທີ່ຈະຈັດຂຶ້ນຢູ່ຈີນ. ສອງປະເທດຄວນປະສານສົມທົບກັນຢ່າງແໜ້ນແຟ້ນ, ຈັດຕັ້ງປະຕິບັດຕາມຜົນຂອງການເຈລະຈາລະຫວ່າງປະມຸກລັດສອງປະເທດ ແລະເພີ່ມເນື້ອໃນການພົວພັນລະຫວ່າງສອງປະເທດ ເພື່ອຊຸກຍູ້ການພັດທະນາເສດຖະກິດ ແລະປັບປຸງຊີວິດການເປັນຢູ່ຂອງປະຊາຊົນມຽນມາ.
ທ່ານຕັງທຸນກ່າວວ່າ, ມຽນມາເອົາໃຈໃສ່ສູງຕໍ່ການຂະຫຍາຍການພົວພັນກັບຈີນ ແລະຍິນດີຮ່ວມກັບຈີນປະຕິບັດຄວາມເປັນເອກະພາບລະຫວ່າງປະມຸກລັດສອງປະເທດ ເພື່ອຊຸກຍູ້ການພົວພັນມຽນມາ-ຈີນໃຫ້ຂະຫຍາຍຕົວດີກວ່າເກົ່າ. ມຽນມາສະແດງຄວາມຂອບໃຈຈີນທີ່ໄດ້ໃຫ້ການສະໜັບສະໜູນອັນຕັ້ງໜ້າຕໍ່ຂະບວນການສັນຕິພາບມຽນມາ ແລະຊ່ວຍເຫຼືອມຽນມາໃນວຽກງານສາກົນ, ຈາກນີ້ຈິ່ງມີຄວາມຍິນດີເພີ່ມທະວີກັບຈີນ ເພື່ອປົກປັກຮັກສາສະຖຽນລະພາບຕາມເຂດຊາຍແດນມຽນມາ-ຈີນ.
 |
