ຕາມຂ່າວສານຈີນ: ສູນຄວບຄຸມການບິນອະວະກາດປັກກິ່ງແຈ້ງໃຫ້ຊາບວ່າ, ເວລາ 7 ໂມງ 26 ນາທີຂອງວັນທີ 23 ເມສານີ້, ຍານອະວະກາດທ່ຽນໂຈ່ວ 1 ເລີ່ມທົດລອງຕື່ມເຊື້ອເພີງຊຸກດັນໃຫ້ຍານອະວະກາດທ່ຽນກົ່ງ 2 ເຊິ່ງການທົດລອງດັ່ງກ່າວຈະສືບຕໍ່ກັນໄປ 5 ມື້ ແລະປັດຈຸບັນ ມີສະພາບດີ. ນີ້ແມ່ນການທົດລອງໃຫ້ຍານອະວະກາດຂົນສົ່ງຕື່ມເຊື້ອເພີງຊຸກດັນໃຫ້ຍານອະວະກາດທ່ຽນກົ່ງ 2 ເປັນຄັ້ງທຳອິດ ແລະກໍແມ່ນການທົດລອງຄັ້ງທຳອິດຂອງຈີນ.
ທ່ານ ຊຸ່ນຈູ່ນ ຮອງນັກວິສະວະກອນໃຫຍ່ຂອງສູນຄວບຄຸມການບິນອະວະກາດປັກກິ່ງໃຫ້ຮູ້ວ່າ, ການທົດລອງຕື່ມເຊື້ອເພີງຊຸກດັນຈະດຳເນີນເປັນຫຼາຍໄລຍະ ເຊິ່ງມີທັງໝົດ 29 ຂັ້ນຕອນ. ຍານອະວະກາດທ່ຽນໂຈ່ວ 1 ແລະທ່ຽນກົ່ງ 2 ຕ້ອງປະສານສົມທົບກັນຢ່າງໃກ້ຊິດ. ເພື່ອຮັບປະກັນເຮັດໃຫ້ການທົດລອງດັ່ງກ່າວດຳເນີນໄປຢ່າງສະດວກ, ສູນຂອງຕົນໄດ້ນຳໃຊ້ເວລາໜຶ່ງປີປາຍ ໂດຍໄດ້ບຸກທະລຸເຕັກນິກສຳຄັນຫຼາຍຂໍ້ໃນການຄວບຄຸມການບິນອະວະກາດ.
ຂ່າວແຈ້ງວ່າ, ວຽກງານຕົ້ນຕໍຂອງສູນຄວບຄຸມການບິນອະວະກາດໃນມື້ດັ່ງກ່າວແມ່ນຕັ້ງແລະກວດກາທ່າຂອງສອງຍານດັ່ງກ່າວ ແລະສ້າງລະບົບຕື່ມເຊື້ອເພີງຊຸກດັນຕາມວົງໂຄຈອນ.