ຫວ່າງມໍ່ໆມານີ້, ສື່ມວນຊົນປາກິສະຖານລາຍງານຂ່າວກ່ຽວກັບຈີນຈະຈັດກອງປະຊຸມສຸດຍອດເວທີປຶກສາຫາລືການຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ"ໂດຍລະບຸວ່າ ກອງປະຊຸມເວທີປຶກສາຫາລືຄັ້ງນີ້ເປັນກອງປະຊຸມສາກົນໃຫຍ່ທີ່ສຸດນັບແຕ່ຈີນສະເໜີຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ"ເປັນຕົ້ນມາ.
ທ່ານປາເວັສ ຄາຕັກ ຫົວໜ້າລັດຖະມົນຕີແຂວງໄຄເປີ ປາກິສະຖານຢືນຢັນວ່າໃນຖານະເປັນໂຄງການສຳຄັນຂອງ "ໜຶ່ງແລວທາງໜຶ່ງເສັ້ນທາງ", ແລວທາງເສດຖະກິດຈີນ-ປາກິສະຖານໄດ້ຍົກສູງຖານະບົດບາດທາງຍຸດທະສາດຂອງແຂວງໄຄເປີ ທັງຊຸກຍູ້ໃຫ້ນັກລົງທຶນສາກົນໄປລົງທຶນແລະພັດທະນາທຸລະກິດຢູ່ແຂວງດັ່ງກ່າວນັບມື້ຫຼາຍຂຶ້ນ ເຊິ່ງໄດ້ເພີ່ມພະລັງແຮງໃໝ່ເຂົ້າໃນການຊຸກຍູ້ການພັດທະນາຂອງແຂວງນີ້.
ທ່ານປາຊາ ນັກການທະນາຄານ, ປະທານບໍລິຫານງານＥＦＵ ບໍລິສັດປະກັນໄພໃຫຍ່ທີ່ສຸດຂອງປາກິສະຖານຢືນຢັນວ່າ ແລວທາງເສດຖະກິດຈີນ-ປາກິສະຖານໃນຖານະເປັນໂຄງການບຸລິມະສິດສຳຄັນຂອງຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ"ໄດ້ຮັບການປະຕິບັດຢ່າງໜັກແໜ້ນຮອບດ້ານແລ້ວ, ກອງປະຊຸມສຸດຍອດ "ໜຶ່ງແລວທາງໜຶ່ງເສັ້ນທາງ"ທີ່ຈະຈັດຂຶ້ນໃນເດືອນພຶດສະພາໜ້ານີ້ກໍເພື່ອຮຽກໂຮມປະເທດທີ່ຕອບຮັບແລະຜູ້ມີສ່ວນຮ່ວມໃນຕໍ່ໜ້າປຶກສາຫາລືຮ່ວມກັນໃນດ້ານນີ້. ບັນດາປະເທດພວມພັດທະນາກໍສະໜັບສະໜູນຢ່າງຕັ້ງໜ້າຕໍ່ເລື່ອງນີ້ທັງຄາດຫວັງເປັນຢ່າງຍິ່ງຕໍ່ກອງປະຊຸມສຸດຍອດດັ່ງກ່າວ.
 |
