ວັນທີ 24 ເມສານີ້, ທ່ານ ສີຈິ້ນຜິງ ປະທານປະເທດຈີນໄດ້ສົ່ງຈົດໝາຍຊົມເຊີຍໄປຍັງກອງປະຊຸມກົນໄກແລກປ່ຽນວັດທະນະທຳລະດັບສູງຈີນ-ອາຟຣິກາໃຕ້ຄັ້ງທຳອິດທີ່ຈັດຂຶ້ນຢູ່ນະຄອນຫຼວງເປຼໂຕເຣຍຂອງອາຟຣິກາໃຕ້.
ທ່ານ ສີຈິ້ນຜິງ ກ່າວເນັ້ນວ່າ: ກົນໄກແລກປ່ຽນວັດທະນະທຳລະດັບສູງຈີນ-ອາຟຣິກາໃຕ້ແມ່ນກົນໄກແລກປ່ຽນວັດທະນະທຳລະດັບສູງກົນໄກທຳອິດທີ່ຈີນກັບປະເທດອາຟຣິກາສ້າງຂຶ້ນ,ແມ່ນການເຄື່ອນໄຫວທີ່ສຳຄັນໃນການຈັດຕັ້ງປະຕິບັດຜົນສຳເລັດຂອງກອງປະຊຸມສຸດຍອດໂຈຮານເນສເບີກຂອງເວທີປຶກສາຫາລືການຮ່ວມມືຈີນ-ອາຟຣິກາ, ຫວັງວ່າຝ່າຍຕ່າງໆທີ່ກ່ຽວຂ້ອງຈະສາມາດຊຸກຍູ້ການຮ່ວມມືດ້ານສາທາລະນະສຸກລະຫວ່າງຈີນ-ອາຟຣິກາໃຫ້ເຂົ້າສູ່ລວງເລິກ,ສ້າງຄວາມສຸກໃຫ້ແກ່ປະຊາຊົນຂອງສອງປະເທດ. ຈີນຍິນດີຮ່ວມກັບປະເທດອາຟຣິກາເຊິ່ງລວມທັງອາຟຣິກາໃຕ້,ຮ່ວມມືສ້າງຍຸກໃໝ່ແຫ່ງການຮ່ວມມືແບບຕ່າງຝ່າຍຕ່າງມີຜົນປະໂຫຍດ ແລະການພັດທະນາຮ່ວມກັນລະຫວ່າງສອງປະເທດ.
ທ່ານ ຈາໂຄບ ຈູມາ ປະທານາທິບໍດີອາຟຣິກາໃຕ້ກໍໄດ້ສົ່ງຈົດໝາຍຊົມເຊີຍໄປຍັງກອງປະຊຸມ,ເຊື່ອວ່າກົນໄກແລກປ່ຽນຈະຊຸກຍູ້ການແລກປ່ຽນແລະການຮ່ວມມືລະຫວ່າງສອງຝ່າຍໃນຂົງເຂດທີ່ກ່ຽວຂ້ອງໃຫ້ປະສົບຜົນສຳເລັດຢ່າງຕັ້ງໜ້າ ພ້ອມທັງຍົກການພົວພັນລະຫວ່າງສອງຝ່າຍຂຶ້ນສູ່ລະດັບໃໝ່.
 |
