ຕາມຂ່າວສານຈີນ: ທ່ານ ຣາມອນ ໂລເປັສ ລັດຖະມົນຕີກະຊວງການຄ້າແລະອຸດສາຫະກຳຟິລິບປິນກ່າວໃນວັນທີ 25 ເມສານີ້ວ່າ, ການທີ່ທ່ານ ໂຣດຣີໂກ ດູເຕີເຕ ປະທານາທິບໍດີປະເທດຕົນ ຊຸກຍູ້ປັບປຸງສາຍພົວພັນກັບຈີນແລະຣັດເຊຍໃຫ້ດີຂຶ້ນນັ້ນ ໄດ້ເຮັດໃຫ້ເສດຖະກິດປະເທດຕົນໄດ້ຮັບຜົນປະໂຫຍດຢ່າງຫຼວງຫຼາຍ.
ທ່ານ ໂລເປັສ ກ່າວຕື່ມວ່າ, ປັດຈຸບັນ, ຖ້າຜະລິດຕະພັນປະເທດຕົນເກີດບັນຫາມາດຕະຖານແລ້ວ, ຈີນຈະສົ່ງນັກວິຊາການມາກວດສອບໂດຍກົງ ເຊິ່ງບໍ່ຄືເມື່ອກ່ອນ ຖ້າເກີດບັນຫາມາດຕະຖານຂຶ້ນ, ຈີນຈະຫ້າມເຂົ້າດ່ານ ແລະຢຸດເຊົາຄຸນວຸດທິຂອງວິສາຫະກິດປະເທດຕົນໃນການສົ່ງອອກສິນຄ້າສູ່ຈີນທັນທີ.
ທ່ານ ໂລເປັສໃຫ້ຮູ້ວ່າ, ມາຮອດປັດຈຸບັນ, ສອງປະເທດໄດ້ເຊັນສັນຍາຈັດຊື້ຜະລິດຕະພັນກະສິກຳແລະອຸດສາຫະກຳທີ່ມີມູນຄ່າ 1 ຕື້ 700 ລ້ານໂດລາ ແລະເພີ່ມມູນຄ່າສົ່ງອອກສູ່ຕະຫຼາດຈີນແລ້ວ.