ຫວ່າງມໍ່ໆມານີ້, ທ່ານ ລີຢົງ ຜູ້ອຳນວຍການໃຫຍ່ອົງການພັດທະນາອຸດສາຫະກຳສະຫະປະຊາຊາດ ໃຫ້ສຳພາດໃນໂອກາດຈັດງານວາງສະແດງອຸດສາຫະກຳຮານໂນເວີເຢຍລະມັນວ່າ, ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ມີຄວາມໝາຍສຳຄັນເລິກເຊິ່ງແລະຍາວໄກຕໍ່ການປະຕິບັດວາລະການພັດທະນາແບບຍືນຍົງ 2030 ຂອງອົງການສະຫະປະຊາຊາດ.
ທ່ານ ລີຢົງ ກ່າວວ່າ, ລັດຖະບານຈີນສະເໜີຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ມີຄວາມໝາຍຕົວຈິງທີ່ເຊື່ອມຕໍ່ປະເທດທີ່ກ່ຽວຂ້ອງດ້ວຍທາງທະເລແລະທາງບົກ, ເຊິ່ງສາມາດຊັກນຳການພັດທະນາການຄ້າຂອງໂລກ, ແກ້ໄຂຜົນກະທົບທາງລົບຈຳນວນໜຶ່ງຈາກວິກິດການການທະນາຄານຂອງໂລກ ແລະສ້າງເສັ້ນທາງໃໝ່ແຫ່ງການພັດທະນາ.
ທ່ານ ລີຢົງ ຍັງຊີ້ໃຫ້ເຫັນວ່າ, ຈຸດປະສົງຕົ້ນຕໍຂອງວາລະການພັດທະນາແບບຍືນຍົງ 2030 ຂອງອົງການສະຫະປະຊາດ ກໍເພື່ອຫຼຸດຜ່ອນຄວາມທຸກຍາກ ເຊິ່ງວິທີທີ່ບັງເກີດຜົນທີ່ສຸດກໍແມ່ນພັດທະນາເສດຖະກິດ. ໃນຂະບວນການດັ່ງກ່າວ, ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ທີ່ສະໜັບສະໜູນສະຫະປະຊາຊາດໃນການປະຕິບັດວາລະດັ່ງກ່າວຢ່າງຕັ້ງໜ້າ ແລະໄດ້ສະໜອງກຳລັງຊຸກດັນທີ່ແຂງແຮງທີ່ສຸດ.
 |
