ໜັງສືພິມ "ເດີຟິລິບປິນສະຕ້າ" ລາຍງານວ່າ: ຫວ່າງມໍ່ໆມານີ້, ເຈົ້າໜ້າທີ່ປະເທດຕົນ ໄດ້ຢືນຢັນໃນພິທີຖະແຫຼງຂ່າວວ່າ: ເນື່ອງຈາກວ່າປີນີ້ປະເທດຕົນເປັນປະທານໝູນວຽນອາຊຽນ ແລະລັດຖະບານໄດ້ຕັ້ງໜ້າຊຸກຍູ້ໂຄງການກໍ່ສ້າງພື້ນຖານໂຄງລ່າງ ຈຶ່ງເຮັດໃຫ້ປະເທດຕົນກາຍເປັນໃຈກາງພັດທະນາພື້ນຖານໂຄງລ່າງໃນພາກພື້ນອາຊຽນ. ຂະນະທີ່ແຜນການກໍ່ສ້າງພື້ນຖານໂຄງລ່າງ 3 ປີຂອງລັດຖະບານ ໄດ້ດຶງດູດຄວາມສົນໃຈແລະການລົງທຶນຈາກປະເທດອື່ນໆໃນອາຊຽນ.
ທ່ານອາເທີ ຕູກາເດ ລັດຖະມົນຕີກະຊວງຄົມມະນາຄົມຟິລິບປິນ ກ່າວວ່າ: ອິນໂດເນເຊຍ ແລະ ມາເລເຊຍ ໄດ້ສະແດງຄວາມຍິນດີທີ່ຈະຮ່ວມມືດ້ານການບິນພົນລະເຮືອນ ແລະ ລະບົບການຄົມມະນາຄົມໃນຕົວເມືອງຂອງປະເທດຕົນ. ຂະນະທີ່ເຈົ້າໜ້າທີ່ຂັ້ນສູງອີກທ່ານໜຶ່ງ ກໍຢືນຢັນວ່າ: ມາເລເຊຍ ແລະ ສິງກະໂປ ສົນໃຈຕໍ່ໂຄງການພັດທະນາເມືອງໃໝ່ເມືອງຄລາກ ປະເທດຕົນເຊັ່ນດຽວກັນ.
