ຕາມຂ່າວສານຈີນ: ພິທີເປີດເສັ້ນທາງທ່ອງທ່ຽວສາກົນສາມຫຼ່ຽມຄຳຕາມແມ່ນ້ຳລ້ານຊ້າງ-ແມ່ນ້ຳຂອງແລະທາງຫຼວງຄຸນມິງ-ບາງກອກໄດ້ຈັດຂຶ້ນຢູ່ທ່າກ່ວນເຫຼີຍສິບສອງພັ່ນນາໃນວັນທີ 1 ພຶດສະພານີ້ ໂດຍນັກທ່ອງທ່ຽວ 200 ກວ່າຄົນຈາກທົ່ວປະເທດຈີນຈະເລີ່ມທ່ອງທ່ຽວໄທ, ມຽນມາ, ລາວ ແລະສິບສອງພັ່ນນາທີ່ລຽບຕາມແມ່ນ້ຳລ້ານຊ້າງ-ແມ່ນ້ຳຂອງ ເຊິ່ງການເປີດເສັ້ນທາງທ່ອງທ່ຽວດັ່ງກ່າວເປັນການເປີດຮູບແບບການທ່ອງທ່ຽວໃໝ່ຂອງແຂວງຢຸນນານ.
ຄຽງຄູ່ກັບການສ້າງ "ໜຶ່ງແລວທາງໜຶ່ງເສັ້ນທາງ" ແລະລິເລີ່ມການຮ່ວມມືອະນຸພາກພື້ນແມ່ນ້ຳລ້ານຊ້າງ-ແມ່ນ້ຳຂອງ, ການທ່ອງທ່ຽວຂ້າມຊາຍແດນຈີນ-ລາວ ແລະການທ່ອງທ່ຽວແມ່ນ້ຳລ້ານຊ້າງ-ແມ່ນ້ຳຂອງໄດ້ກາຍເປັນທິດທາງ ແລະຈຸດເດັ່ນໃໝ່ໃນການທ່ອງທ່ຽວຂອງແຂວງຢຸນນານ. ທ່ານສິນຈຸ່ງໂໝ ຫົວໜ້າຫ້ອງການການທະເລກິ່ງແຂວງສິບສອງພັ່ນນາກ່າວວ່າ, ພາຍຫຼັງໄດ້ລົງນາມໃນສັນຍາເດີນເຮືອ ຢູ່ຕາມແມ່ນ້ຳລ້ານຊ້າງ-ແມ່ນ້ຳຂອງລະຫວ່າງ 4 ປະເທດ ຈີນ, ລາວ, ມຽນມາ ແລະໄທເມື່ອປີ 2000 ແລະເລີ່ມເດີນເຮືອຢ່າງເປັນທາງການໃນປີ 2001 ເປັນຕົ້ນມາ, ການເດີນເຮືອສາກົນຈາກການບໍ່ມີກໍໄດ້ເກີດຂຶ້ນ, ຈາກໜ້ອຍຫາຫຼາຍ ເຊິ່ງໄດ້ຊຸກຍູ້ການພັດທະນາເສດຖະກິດສັງຄົມຂອງເຂດລຽບແມ່ນ້ຳລ້ານຊ້າງ-ແມ່ນ້ຳຂອງ. ຄຽງຄູ່ກັບການປະຕິບັດໂຄງການປັບປຸງທາງເດີນເຮືອ 4 ຂັ້ນຢູ່ຕາມແມ່ນ້ຳລ້ານຊ້າງ ແລະການປະຕິບັດໂຄງການປັບປຸງທາງເດີນເຮືອໄລຍະທີສອງຢູ່ຕາມແມ່ນ້ຳຂອງ, ການພັດທະນາການເດີນເຮືອສາກົນກໍຈະກ້າວຂຶ້ນສູ່ລະດັບໃໝ່.
 |
