ທ່ານອຸດຕະມະ ຊະວະນາຢານາ ລັດຖະມົນຕີກະຊວງອຸດສາຫະກຳໄທເປີດເຜີຍເມື່ອມໍ່ໆນີ້ວ່າ, ໄທຈະຮ່ວມກັບເຂດບໍລິຫານພິເສດຮົງກົງ ຊຸກຍູ້ການຮ່ວມມືທຸລະກິດລະຫວ່າງວິສາຫະກິດຂະໜາດກາງແລະນ້ອຍທາງອິນເຕີເນັດ.
ທ່ານອຸດຕະມະກ່າວວ່າ, ຂະນະທີ່ເດີນທາງຮ່ວມໃນຄະນະຂອງທ່ານຮອງນາຍົກລັດຖະມົນຕີສົມຄິດຢ້ຽມຢາມຮົງກົງນັ້ນ, ສອງຝ່າຍໄດ້ລົງນາມໃນສັນຍາຮ່ວມມືຊ່ວຍວິສາຫະກິດຂະໜາດກາງແລະນ້ອຍຍົກຄວາມສາມາດໃນການດຳເນີນທຸລະກິດແລະຄວາມບົ່ມຊ້ອນດ້ານການພັດທະນາ ໂດຍສະເພາະວິສາຫະກິດໃນຂະແໜງການອາຫານແລະເຄື່ອງດື່ມ, ເຄື່ອງປະດັບ, ຜະລິດຕະພັນເຄື່ອງແຟຊັນ, ເຄື່ອງໃຊ້ໃນເຮືອນ ແລະອື່ນໆ. ທັງນີ້ຕາມຈຸດປະສົງໃນການຮ່ວມມືເບື້ອງຕົ້ນຄັ້ງນີ້ນັ້ນໄດ້ໃຫ້ໄທເລືອກເອົາວິສາຫະກິດຂະໜາດກາງແລະນ້ອຍ 200 ແຫ່ງເຂົ້າຮ່ວມການຮ່ວມມືເທື່ອນີ້.
ທ່ານກ່າວຕື່ມວ່າ, ວິສາຫະກິດຂະໜາດກາງແລະນ້ອຍຂອງໄທສາມາດນຳໃຊ້ຮົງກົງ ທີ່ເປັນປ່ອງຢ້ຽມໂລກ ເພື່ອບຸກເບີກຕະຫຼາດໃຫ້ກວ້າງຂວາງກວ່າເກົ່າ, ສ່ວນຮົງກົງຈະນຳໃຊ້ໄທ ບຸກເຂົ້າຕະຫຼາດກຳປູເຈຍ, ລາວ, ມຽນມາ ແລະຫວຽດນາມ.
 |
