ວັນທີ 4 ພຶດສະພານີ້ ຢູ່ນະຄອນຫຼວງວຽງຈັນ, ທ່ານນາງ ເສີ້ນເຢ້ເຢ້ ຮອງປະທານຄະນະກຳມະການປະຈຳສະພາປະຊາຊົນແຫ່ງຊາດ, ປະທານສະຫະພັນແມ່ຍິງທົ່ວປະເທດຈີນໄດ້ພົບປະກັບທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດລາວ.
ໂອກາດດັ່ງກ່າວ,ທ່ານນາງ ເສີ້ນເຢ້ເຢ້ ໄດ້ແຈ້ງຜົນສຳເລັດອັນໃຫຍ່ຫຼວງຂອງພັກ-ລັດໃນການປົກປັກຮັກສາແລະພັດທະນາປະເທດຕົນແຕ່ກອງປະຊຸມໃຫຍ່ພັກກອມມູນິດຈີນຄັ້ງທີ 18 ເປັນຕົ້ນມາ ຂະນະດຽວກັນກໍເຫັນວ່າຄວນເພີ່ມທະວີການແລກປ່ຽນລະຫວ່າງແມ່ຍິງຂອງສອງປະເທດ, ຮ່ວມກັນຊຸກຍູ້ການສ້າງ "ໜຶ່ງແລວທາງໜຶ່ງເສັ້ນທາງ", ຮ່ວມມືສ້າງປະຊາຄົມຮ່ວມຊະຕາກຳຈີນ-ລາວໃຫ້ໜັກແໜ້ນ.
ທ່ານ ປານີ ຢາທໍ່ຕູ້ ໄດ້ຕີລາຄາຢ່າງສູງຕໍ່ສາຍພົວພັນລະຫວ່າງລາວກັບຈີນ ແລະຫວັງວ່າລັດຖະສະພາແລະອົງການຈັດຕັ້ງແມ່ຍິງຂອງສອງປະເທດຄວນເພີ່ມທະວີການຮ່ວມມື,ຊຸກຍູ້ສາຍພົວພັນລະຫວ່າງສອງປະເທດໃຫ້ພັດທະນາແລະກ້າວເຂົ້າສູ່ລວງເລິກ.