ກົມໃຫຍ່ສ່ວຍສາອາກອນອິນໂດເນເຊຍເປີດເຜີຍວ່າ, ລັດຖະບານປະເທດຕົນກຽມຈະປັບປຸງຂໍ້ກຳນົດເລກທີ 256 ປີ 2008 ຂອງກະຊວງການເງິນ ເພື່ອເພີ່ມທະວີການຕິດຕາມຄຸ້ມຄອງພາສີຂອງວິສາຫະກິດຕ່າງປະເທດ.
ເຈົ້າໜ້າທີ່ກົມປະຕິຮູບພາສີກົມໃຫຍ່ພາສີອາກອນອິນໂດເນເຊຍກ່າວວ່າ, ຂໍ້ກຳນົດໃໝ່ມີຈຸດປະສົງຕິດຕາມການລັກລອບໜີພາສີຂອງບໍລິສັດທຶນຕ່າງປະເທດສາຂາອິນໂດເນເຊຍ ແລະຈະກຳນົດດັດຊະນີທີ່ສຳຄັນຕ່າງໆ ເຊັ່ນ ມາດຕະຖານໃນການຄວບຄຸມຫຸ້ນ ແລະອື່ນໆ. ເຈ້າໜ້າທີ່ກຸ່ມນີ້ກ່າວຕື່ມວ່າ, ບົດລາຍງານຂໍ້ມູນຖືຫຸ້ນຂອງບາງບໍລິສັດທຶນຕ່າງປະເທດພາໃຫ້ພວກເຮົາເອົາໃຈກວດກາ, ຍ້ອນຜູ້ເສຍພາສີບາງຄົນໄດ້ຖືຫຸ້ນຂອງບໍລິສັດເຫຼົ່ານີ້ມາຫຼາຍກວ່າ 15 ປີແລ້ວ, ແຕ່ພັດກ່າວວ່າບໍ່ໄດ້ຮັບກຳໄລດອກເບ້ຍໃບຫຸ້ນ, ຍ້ອນວ່າຂໍ້ກຳນົດສະບັບປັດຈຸບັນມີແຕ່ເກັບພາສີນຳຜູ້ຖືຫຸ້ນທີ່ໄດ້ຮັບກຳໄລດອກເບ້ຍໃບຫຸ້ນ ເຊິ່ງເຮັດໃຫ້ກຸ່ມນີ້ສວຍໂອກາດໜີພາສີ.
ນອກນີ້, ເພື່ອເລັ່ງຂະບວນການດັ່ງກ່າວ, ລັດຖະບານອິນໂດເນເຊຍໄດ້ຕົກລົງນຳໃຊ້ຮູບການປັບປຸງຂໍ້ກຳນົດຂອງລັດຖະບານຫາກບໍ່ແມ່ນປັບປຸງກົດໝາຍ ເພື່ອສາມາດປະຕິບັດນະໂຍບາຍໃໝ່ໂດຍໄວ.
 |
